ନୂଆଦିଲ୍ଲୀ,୧୫।୨: ଆମ ଆଦମି ପାର୍ଟି(ଏଏପି)ର ମୁଖ୍ୟ ଅରବିନ୍ଦ କେଜରିଓ୍ବାଲ ତୃତୀୟ ଥର ଲାଗି ରବିବାର ଦିଲ୍ଲୀର ମୁଖ୍ୟମନ୍ତ୍ରୀ ଭାବେ ଶପଥ ନେବାକୁ ଯାଉଛନ୍ତି। ଏଥିରେ ବାହାର ରାଜ୍ୟର କୌଣସି ନେତା ବା ମନ୍ତ୍ରୀଙ୍କୁ ସାମିଲ କରାଯାଉ ନ ଥିବା ବେଳେ ଦିଲ୍ଲୀବାସୀଙ୍କୁ କିନ୍ତୁ କେଜରିଓ୍ବାଲଙ୍କ ଶପଥ ଗ୍ରହଣ ସମାରୋହରେ ଯୋଗ ଦେବାକୁ ଅନୁରୋଧ କରାଯାଇଛି। ଏହାକୁ ନେଇ ଏଏପି ନେତା ମନିଷ ସିସୋଡିଆ ଶନିବାର ଏକ ଖବରଦାତା ସମ୍ମିଳନୀର ଆୟୋଜନ କରି କିଛି ସୂଚନା ଦେଇଛନ୍ତି। ସିସୋଡିଆ କହିଛନ୍ତି କେଜରିଓ୍ବାଲଙ୍କ ଶପଥ ଗ୍ରହଣ ସମାରୋହରେ ବିଭିନ୍ନ ସ୍କୁଲର ଶିକ୍ଷୟିତୀ-ଶିକ୍ଷକ, ପ୍ରିନ୍ସପାଲ, ସ୍କୁଲର ଚତୁର୍ଥ ଶ୍ରେଣୀ କର୍ମଚାରୀ, ଛାତ୍ରୀଛାତ୍ର ଯେଉଁମାନେ ଜୟ ଭିମ ଯୋଜନାରେ ଲାଭବାନ ହୋଇଛନ୍ତି , ମୋହଲା କ୍ଲିନିକ ଡାକ୍ତର, ବାଇକ୍ ଆମ୍ବୁଲାନ୍ସ ଡ୍ରାଇଭର, ସିଗ୍ନେଚର ବ୍ରିଜର ସ୍ଥପତି ଆଦି ଯୋଗଦେବେ। ସୂଚନାଯୋଗ୍ୟ, ରାମଲୀଳା ମଇଦାନରେ ଆୟୋଜିତ ହେବାକୁ ଥିବା ଏହି ଶପଥ ଗ୍ରହଣ ଉତ୍ସବ ପାଇଁ ସମସ୍ତ ପ୍ରସ୍ତୁତି ଏକ ପ୍ରକାର ଶେଷ ପର୍ଯ୍ୟାୟରେ ପହଞ୍ଚିଲାଣି। ରବିବାର ସକାଳ ପ୍ରାୟ ୧୦ଟାରେ କେଜରିଓ୍ବାଲ ସେଠାରେ ମୁଖ୍ୟମନ୍ତ୍ରୀ ଭାବେ ଶପଥ ନେବେ।
