ପରଜଙ୍ଗ, ୩୧।୮(ଡି.ଏନ.ଏ.) – ଢେଙ୍କାନାଳ ବନଖଣ୍ଡ କାମାକ୍ଷାନଗର ପଶ୍ଚିମାଞ୍ଚଳ ରେଞ୍ଜ ମୁକ୍ତାପଶି ଫରେଷ୍ଟେ ସେକ୍ସନ ଅଧୀନ ଦେଇ ଯାଇଥିବା ରେଙ୍ଗାଳି ମୁଖ୍ୟ ବାମ କେନାଲରେ ଶୁକ୍ରବାର ଏକ ଦନ୍ତା ହାତୀ ଫସିଯାଇଥିଲା। କେନାଲ ନିକଟବର୍ତ୍ତୀ ସିଆରିମାଳିଆ ସଂରକ୍ଷିତ ଜଙ୍ଗଲରୁ ଉକ୍ତ ଦନ୍ତା ଆସୁଥିବାବେଳେ ହଠାତ୍ କେନାଲ ଭିତରକୁ ପଶିଯାଇଥିଲା। ହେଲେ ଅଧିକ ପାଣି ଥିବାରୁ ଉପରକୁ ଉଠି ପାରି ନ ଥିଲା। ବନ କର୍ମଚାରୀ ପାଟି କରି ଘଉଡ଼ାଇବା ପରେ ଦନ୍ତା ପହଁରି ପହଁରି କେନାଲରେ ଗାଧୋଇବା ଉଦ୍ଦେଶ୍ୟରେ ନିର୍ମିତ ପାହାଚ ଦେଇ ଉପରକୁ ବାହାରିଥିଲା। ଏହାପରେ ସେ ଅନନ୍ତପୁର ସଂରକ୍ଷିତ ଜଙ୍ଗଲକୁ ପଳାଇଯାଇଛି। ମୁକ୍ତାପଶି ଫରେଷ୍ଟର ଚନ୍ଦ୍ରଶେଖର ବେହେରା, ଗାର୍ଡ ନିରଞ୍ଜନ ନାୟକ ସଦଳବଳ ହାତୀ ଉପରେ ନଜର ରଖିଥିଲେ।
