ନୂଆଦିଲ୍ଲୀ,୨୨-୧୧(ପି.ଟି.):କେନ୍ଦ୍ର ସରକାରଙ୍କ ବିଭିନ୍ନ ବିଭାଗରେ ପାଖାପାଖି ୭ ଲକ୍ଷ ପଦବୀ ଖାଲିପଡିଥିବା ରାଜ୍ୟ ସଭାରେ କେନ୍ଦ୍ରମନ୍ତ୍ରୀ ଜିତେନ୍ଦ୍ର ସିଂ କହିଛନ୍ତି। ଗତବର୍ଷ ମାର୍ଚ୍ଚ ୧ ସୁଦ୍ଧା ବିଭିନ୍ନ ବିଭାଗରେ ମୋଟ ୬ ଲକ୍ଷ ୮୩ ହଜାର ୮୨୩ ପଦବୀ ଖାଲି ରହିଛି। ସେଥିମଧ୍ୟରୁ ଗ୍ରୁପ୍ ସ’ରେ ୫,୭୪,୨୮୯ ପଦବୀ ଖାଲି ଥିବାବେଳେ ଗ୍ରୁପ୍ ବି’ରେ ୮୯,୬୩୮ ଏବଂ ଗ୍ରୁପ୍ ଏ’ରେ ୧୯,୮୯୬ ପଦବୀ ଖାଲି ରହିଥିବା କାର୍ମିକ ବିଭାଗ ରାଷ୍ଟ୍ରମନ୍ତ୍ରୀ କହିଥିଲେ। ଚଳିତ ଆର୍ଥତ୍କ ବର୍ଷରେ ୧,୦୫,୩୩୮ ପଦବୀ ପୂରଣ ଲାଗି ଷ୍ଟାଫ୍ ସିଲେକ୍ସନ କମିଶନ (ଏସ୍ଏସ୍ସି) ନିଯୁକ୍ତି ପ୍ରକ୍ରିୟା ଆରମ୍ଭ କରିଛନ୍ତି। ୨୦୧୭-୧୮ରେ ବିଭିନ୍ନ ଗ୍ରୁପ୍ ସି ଏବଂ ଲେଭଲ୍-୧ର ୧,୨୭,୫୭୩ ପଦବୀ ଲାଗି ରେଲଓ୍ବେ ନିଯୁକ୍ତି ବୋର୍ଡ (ଆର୍ଆର୍ବି) ଏବଂ ରେଳ ମନ୍ତ୍ରଣାଳୟ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଥିଲା। ଏହା ପରେ ୨୦୧୮-୧୯ରେ ଗ୍ରୁପ୍ ସି ଏବଂ ଲେଭଲ୍-୧ରେ ୧,୫୬,୧୩୮ ପଦବୀ ପୂରଣ ପାଇଁ ୫ ଥର ବିଜ୍ଞପ୍ତି ପ୍ରକାଶ ପାଇଥିଲା। ଡାକ ବିଭାଗ ୧୯,୫୨୨ ପଦବୀ ପୂରଣ ଲାଗି ବିଜ୍ଞପ୍ତି ପ୍ରକାଶ ପାଇବା ସହ ପରୀକ୍ଷା କରାଯାଇଥିଲା। ଏହିପରି ମୋଟ ୪,୦୮,୫୯୧ ପଦବୀ ପୂରଣ ପାଇଁ ଏସ୍ଏସସି, ରେଳପଥ ନିଯୁକ୍ତି ବୋର୍ଡ ଏବଂ ଡାକ ବିଭାଗ ପକ୍ଷରୁ ନିଯୁକ୍ତି ପ୍ରକ୍ରିୟା ଜାରି ରହିଥିବା ମନ୍ତ୍ରୀ କହିଛନ୍ତି।
