ଥିରୁଭାନନ୍ଥପୁରମ,୭।୨: କେରଳ ସରକାରଙ୍କ ଦ୍ୱାରା ଆର୍ଥିକ ବର୍ଷ ୨୦୨୦-୨୧ ପାଇଁ ପ୍ରକାଶ କରାଯାଇଥିବା ବଜେଟର କଭର ପେଜ୍କୁ ନେଇ ଏବେ ବିବାଦ ମୁଣ୍ଡ ଟେକିଛି। କେରଳ ମୁଖ୍ୟମନ୍ତ୍ରୀ ପିନାରାଇ ବିଜୟନଙ୍କ ସରକାର ଏବେ ଏହାକୁ ନେଇ ଚର୍ଚ୍ଚାର ପରିସରକୁ ଚାଲିଆସିଛନ୍ତି। ବଜେଟର କଭର ପେଜ୍ରେ ଜାତିରପିତା ମହାତ୍ମା ଗାନ୍ଧୀଙ୍କ ମୃତ୍ୟୁ ସମୟର ଏକ ପେଣ୍ଟିଂକୁ ସ୍ଥାନ ଦେଇ ଏବେ କେରଳ ସରକାର ବିବାଦ ଘେରକୁ ଚାଲି ଆସିଛନ୍ତି। ଏହାର ସଫେଇ ଦେବାକୁ ଯାଇ କେରଳର ଅର୍ଥମନ୍ତ୍ରୀ କହିଛନ୍ତି ଏହା ଏକ ପଲିଟିକାଲ ଷ୍ଟେଟମେଣ୍ଟ। ଏହା ଜଣେ ମାଲୟାଲମ ଚିତ୍ରଶିଳ୍ପୀଙ୍କ ପେଣ୍ଟିଂ ବୋଲି ସେ କହିଛନ୍ତି। ଏହା ମାଧ୍ୟମରେ ଆମେ ବାର୍ତ୍ତା ଦେବାକୁ ଚାହୁଁଛୁ ଯେ ମହାତ୍ମା ଗାନ୍ଧୀଙ୍କୁ କିଏ ହତ୍ୟା କରିଥିଲା। ସେ ଆହୁରି ମଧ୍ୟ ଅଭିଯୋଗ କରିଛନ୍ତି କି ଏବେ ଇତିହାସ ପୁଣିଥରେ ଲେଖାଯାଉଛି। ରାଷ୍ଟ୍ରୀୟ ନାଗରିକ ପଞ୍ଜିକା(ଏନ୍ଆର୍ସି) ଆଳରେ ଦେଶ ଓ ସମ୍ପ୍ରଦାୟ ମଧ୍ୟରେ ବିଭାଜନ ସୃଷ୍ଟି ହେଉଛି ବୋଲି ସେ କହିଛନ୍ତି। ଏବେ କିଛି ଲୋକପ୍ରିୟ ସ୍ମୃତିକୁ ଲିଭାଇବାକୁ ଚେଷ୍ଟା କରାଯାଉଛି ହେଲେ କେରଳ ଏକତାର ସୂତ୍ରରେ ବାନ୍ଧି ରହିଛି ବୋଲି ଯୁକ୍ତି ବାଢିଛନ୍ତି ଅର୍ଥମନ୍ତ୍ରୀ।
