ନୂଆଦିଲ୍ଲୀ,୧୭।୫: କରୋନା ଭାଇରସ ମୁକାବିଲା ପାଇଁ ପୂର୍ବତନ ପାକିସ୍ତାନ ଦ୍ରୁତ ବୋଲର ସୋଏବ ଅଖତର ଆଉ ଏକ ଦୃଷ୍ଟାନ୍ତମୂଳକ କାଯ୍ୟ କରିଛନ୍ତି। ବଲିଉଡ ସୁପରଷ୍ଟାର ଶାହରୁଖ ଖାନ ତାଙ୍କୁ ୧୫ ବର୍ଷ ତଳେ ଦେଇଥିବା ଏକ ସ୍ବତନ୍ତ୍ର ଉପହାରକୁ ସେ ଚ୍ୟାରିଟି ପାଇଁ ଦାନ କରିଛନ୍ତି। ଅଖତର ସେତେବେଳେ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ଫ୍ରାଞ୍ଚାଇଜ୍ କୋଲକାତା ନାଇଟ ରାଇଡର୍ସ ପାଇଁ ଖେଳୁଥିଲେ। ୨୦୦୮ରେ ଅଖତର ଦିଲ୍ଳୀ ଡେୟାର ଡେଭିଲ୍ସ ବିପକ୍ଷ ମ୍ୟାଚ୍ରେ ୩ ଓଭରରେ ୧୧ ରନ ବ୍ୟୟ କରି ୪ ଉଇକେଟ ଅକ୍ତିଆର କରିବା ସହ ମ୍ୟାନ୍ ଅଫ୍ ଦି ମ୍ୟାଚ୍ ବିବେଚିତ ହୋଇଥିଲେ। ଏଥିରେ ଖୁସି ହୋଇ କୋଲକାତାର ଅନ୍ୟତମ ମାଲିକ ଶାହରୁଖ ତାଙ୍କ ଦସ୍ତକ୍ଷତ ସମ୍ବଳିତ ଏକ ହେଲମେଟ ଉପହାର ସ୍ବରୂପ ପ୍ରଦାନ କରିଥିଲେ। ଏହି ମ୍ୟାଚ୍ରେ କୋଲକାତା ୧୩୩ ରନ କରିଥିଲା। ତେବେ ଦିଲ୍ଲୀ ୧୧୦ ରନରେ ସୀମିତ ରହି ପରାଜୟ ବରଣ କରିଥିଲା। ପାକିସ୍ତାନ୍ ଟେନିସ ତାରକା ଏହସାମ ଉଲ ହକ୍ ଅଖତରଙ୍କ ଫଟୋ ସେୟାର କରି ଏହି ଦାନ ପାଇଁ କୃତଜ୍ଞତା ଜଣାଇଛନ୍ତି। ଏହି ଦାନ ସ୍ବତନ୍ତ୍ର ବୋଲି ଜବାବରେ ଉଲ୍ଲେଖ କରିଛନ୍ତି ଅଖତାର। ଏହି ହେଲମେଟ ଚ୍ୟାରିଟି ପାଇଁ ପାଣ୍ଠି ସଂଗ୍ରହରେ ବେଶ୍ ସହାୟ ହେବ ବୋଲି ସେ ଆଶା ପ୍ରକାଶ କରିଛନ୍ତି।
