ନୂଆଦିଲ୍ଲୀ,୧୫।୪(ପି.ଟି.): ଭାରତୀୟ କ୍ରିକେଟ କୋଚ୍ ରବି ଶାସ୍ତ୍ରୀ କୋଭିଡ୍-୧୯ ବିରୋଧରେ ଚାଲିଥିବା ଲଢେଇକୁ ସବୁଠାରୁ ଗୁରୁତ୍ୱପୂର୍ଣ୍ଣ ବୋଲି କହିଛନ୍ତି। ଦେଶରେ ଚାଲିଥିବା ଏହି ଲଢେଇ ସବୁ ବିଶ୍ୱକପ୍ଠାରୁ ବଡ଼ ବୋଲି ଶାସ୍ତ୍ରୀ ତାଙ୍କ ଟୁଇଟର ଆକାଉଣ୍ଟରେ ଭିଡିଓ ପୋଷ୍ଟ କରି ଜଣାଇଛନ୍ତି। ଏହି ମାହାମରୀ ବିପକ୍ଷରେ ଲଢେଇ ହେଉଛି ସବୁଠାରୁ ଗୁରୁତ୍ୱପୂର୍ଣ୍ଣ। ଏହି ଲଢେଇ ମଧ୍ୟ କୌଣସି ବିଶ୍ୱକପ୍ଠାରୁ କମ୍ ନୁହଁ। ଏଥିରେ କେବଳ ୧୧ଜଣ ଖେଳାଳି ନୁହଁ, ୧୪୦ କୋଟି ଲୋକ ଖେଳୁଛନ୍ତି। ସମସ୍ତେ ନିଜ ନିଜ ହିସାବରେ ଏହି ଲଢେଇ ଜାରି ରଖିଛନ୍ତି। କରୋନା ବିରୋଧରେ ଆମେ ସମସ୍ତେ ଏକାଠି ହେବା ଓ ଏହାକୁ ପରାସ୍ତ କରିବାକୁ ବଦ୍ଧପରିକର ହେବା ଉଚିତ। ମାନବତାର ଏହି ବିଶ୍ୱକପ୍ରେ ଆମେ ବିଜୟୀ ହେବାକୁ ପ୍ରୟାସ କରିବା ଉଚିତ ବୋଲି ସେ କହିଛନ୍ତି।
ଏହି ମାହାମାରୀ ବିପକ୍ଷ ଲଢେଇରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଭୂମିକାକୁ ସେ ପ୍ରଶଂସା କରିଛନ୍ତି। ଏହି ଲଢେଇର ନେତୃତ୍ୱ ନେଉଛନ୍ତି ମୋଦି। ଆମେ ଏହି ଲଢେଇରେ ବିଜୟୀ ହେବା। ତେବେ ଆମକୁ ବିଶେଷ ଭାବେ କେତୋଟି ଦିଗକୁ ଧ୍ୟାନ ଦେବାକୁ ହେବ। ଏ ନେଇ ଜାରି ହୋଇଥିବା ନିର୍ଦ୍ଦେଶନାମାକୁ ଆମେ ସମସ୍ତେ ମାନିବା ଉଚିତ। ଘରେ ରହିବା ସହ ସାମାଜିକ ଦୂରତ୍ୱ ରକ୍ଷା କରିବାକୁ ସେ ସମସ୍ତଙ୍କୁ ନିବେଦନ କରିଛନ୍ତି। ଏହାକୁ ନ ମାନିଲେ ଏହି ଲଢେଇରେ ଆମେ ଜିତିବା ସମ୍ଭବ ନୁହଁ ବୋଲି ସେ ସ୍ପଷ୍ଟ କରିଛନ୍ତି।
ବିଶ୍ୱରେ ଏପର୍ଯ୍ୟନ୍ତ ଏହି ମହାମାରୀରେ ୧ ଲକ୍ଷ ୨୦ ହଜାର ଲୋକ ପ୍ରାଣ ହରାଇଲେଣି ଓ ୨୦ ଲକ୍ଷ ଲୋକ ସଂକ୍ରମିତ ହୋଇଛନ୍ତି। ସାରା ବିଶ୍ୱରେ କ୍ରୀଡ଼ା ଇଭେଣ୍ଟ ଗୁଡିକ ଏଥିପାଇଁ ବାତିଲ ହୋଇଛି କିମ୍ବା ସ୍ଥଗିତ ରଖାଯାଇଛି। ଗତମାସ ମଧ୍ୟ ଶାସ୍ତ୍ରୀ ସମାନ କଥା କହିଥିଲେ। ଯେ କୌଣସି ପ୍ରକାର ପରିସ୍ଥିତିରେ ଘରେ ରହିବା ଉପରେ ସେ ଗୁରୁତ୍ୱ ଦେଇଥିଲେ। ଏହି ଲଢେଇ ଆଦୌ ସହଜ ନୁହଁ। ତେଣୁ ବିଜୟୀ ହେବା ପାଇଁ ଆହୁରି ଆମକୁ ସତର୍କତା ଅବଲମ୍ବନ କରିବାକୁ ହେବ ବୋଲି ଶାସ୍ତ୍ରୀ କହିଛନ୍ତି।
