କୋରାପୁଟ,୨୩।୧୧(ସ୍ବ.ପ୍ର.):କୋରାପୁଟ ଜିଲାରେ ସପ୍ତାହେ ଧରି ପ୍ରବଳ ଶୀତ ଲହରି ଜାରି ରହିଥିବାରୁ ଜନଜୀବନ ପ୍ରଭାବିତ ହୋଇଛି। ଜିଲାରେ ତାପମାତ୍ରା ଦିନରେ ସବନିମ୍ନ ୨୫ ଡିଗ୍ରୀ ରହୁଥିବା ବେଳେ ସର୍ବାଧିକ ୩୦ ଡିଗ୍ରୀ ରହୁଛି। ସେହିପରି ରାତିରେ ପାରଦ ୧୬ରୁ ୨୦ଡିଗ୍ରୀ ମଧ୍ୟରେ ରହୁଛି। ପୂର୍ବାହ୍ନ ୯ଟା ପର୍ଯ୍ୟନ୍ତ ସହରରେ କୁହୁଡି ସାଙ୍ଗକୁ କୋହଲା ପାଗ ଲାଗିରହୁଛି। ଜିଲାର ପଟାଙ୍ଗୀ, ଲକ୍ଷ୍ମୀପୁର, ନନ୍ଦପୁର, ସେମିଳିଗୁଡ଼ା ଆଦି ଅଞ୍ଚଳରେ ଅଧିକ ଶୀତ ଅନୁଭୂତ ହେଉଛି। ଘନ କୁହୁଡ଼ିର ଆସ୍ତରଣ ଯୋଗୁ ରାସ୍ତାରେ ୨୦ଫୁଟ ବ୍ୟବଧାନରେ ଯାନବାହନ ଦେଖାଯାଉନାହଁ। ସୁଙ୍କି ଓ ଜୟପୁରର ଅଣଓସାରିଆ ଘାଟି ରାସ୍ତାରେ ଗାଡ଼ି ଚାଳକମାନେ ମନ୍ଥର ଗତିରେ ଗାଡ଼ି ଚଳାଉଥିବା ବେଳେ ସ୍ଥାନେ ସ୍ଥାନେ ଗାଡ଼ିକୁ ଅଟକାଉଥିବା ମଧ୍ୟ ଦେଖିବାକୁ ମିଳିଛି। ଶୀତ ଦାଉରୁ ରକ୍ଷା ପାଇଁ ଗ୍ରାମାଞ୍ଚଳ ଲୋକେ ଦିନରାତି ନିଆଁ ପାଖରେ ବସିରହୁଥିବା ଦେଖିବାକୁ ମିଳିଛି।
