ନୂଆଦିଲ୍ଲୀ,୧।୬: ଭାରତୀୟ ଅଧିନାୟକ ବିରାଟ କୋହଲି ଏବେ ବିଶ୍ୱର ଶ୍ରେଷ୍ଠ ବ୍ୟାଟ୍ସମ୍ୟାନ ଭାବେ ପରିଗଣିତ ହେଉଛନ୍ତି। ପାକିସ୍ତାନ ଯୁବ ଦ୍ରୁତ ବୋଲର କୋହଲିଙ୍କୁ ବୋଲିଂ କରିବା ପାଇଁ ବେଶ୍ ଉତ୍ସୁକ ରହିଛନ୍ତି। ମାତ୍ର ୧୭ ବର୍ଷରେ ସେ ପାକିସ୍ତାନ ପାଇଁ ପଦାର୍ପଣ କରିଥିଲେ ଓ ବିଶ୍ୱର ସର୍ବକନିଷ୍ଠ କ୍ରିକେଟର ଭାବେ ସେ ହ୍ୟାଟ୍ରିକ ଅର୍ଜନ କରି ରେକର୍ଡ ସ୍ଥାପନ କରିଥିଲେ। ଏବେ କ୍ୟାରିୟରର ପ୍ରାରମ୍ଭିକ ପର୍ଯ୍ୟାୟ ଦେଇ ଗତିକରୁଥିବା ନସିମ ଆଗକୁ ସବୁ ପ୍ରକାର ଚ୍ୟାଲେଞ୍ଜକୁ ସାମ୍ନା କରିବାକୁ ପ୍ରସ୍ତୁତ ଅଛନ୍ତି ବୋଲି କହିଛନ୍ତି। କୋହଲିଙ୍କୁ ବୋଲିଂ କରିବାକୁ ଅପେକ୍ଷା କରିଛି। କୋହଲି ଜଣେ ଶ୍ରେଷ୍ଠ ବ୍ୟାଟ୍ସମ୍ୟାନ। ତାଙ୍କୁ ସମ୍ମାନ କରେ। କିନ୍ତୁ ତାଙ୍କୁ ଆଦୌ ଭୟ କରେନାହିଁ ବୋଲି ନସିମ କହିଛନ୍ତି। ଭାରତ- ପାକିସ୍ତାନ ମ୍ୟାଚ ସବୁବେଳେ ସ୍ବତନ୍ତ୍ର ଥାଏ। ଗୋଟିଏ ମ୍ୟାଚ୍ରେ ଜଣେ ଖେଳାଳି ନାୟକ କିମ୍ବା ଖଳନାୟକ ହୋଇପାରେ ବୋଲି ମୋତେ କୁହାଯାଇଛି। ଏବେ ମ୍ୟାଚ୍ କମ୍ ହେଉଥିବାରୁ ସୁଯୋଗ ମିଳିଲେ ଭାରତ ବିପକ୍ଷରେ ଖେଳିବାକୁ ପ୍ରସ୍ତୁତ ଅଛି ବୋଲି ସେ କହିଛନ୍ତି। ଭାରତ ବିପକ୍ଷରେ ଭଲ ବୋଲିଂ କରି ପାରିବି ବୋଲି ଆଶା କରୁଛି। ଯୁଯୋଗ ମିଳିଲେ ଆମ ପ୍ରଶଂସକଙ୍କୁ ନିରାଶ କରିବି ନାହିଁ। ଜଣେ ଖେଳାଳି ତା’ର ସର୍ବଶ୍ରେଷ୍ଠ ପ୍ରଦର୍ଶନ ସବୁବେଳେ କରିପାରି ନ ଥାଏ। କିନ୍ତୁ ଖେଳରେ ଉନ୍ନତି ଆଣିବାକୁ ପ୍ରୟାସ କରେ। କୋହଲି ଓ ଟିମ୍ ଇଣ୍ଡିଆକୁ ସାମ୍ନା କରିବାକୁ ପ୍ରସ୍ତୁତ୍ ଅଛି ବୋଲି ନସିମ କହିଛନ୍ତି। ଉଲ୍ଲେଖଥାଉ କି, ଟେଷ୍ଟ କ୍ରିକେଟ ନସିମ ପାକିସ୍ତାନର ଚତୁର୍ଥ ବୋଲର ସାବ୍ୟସ୍ତ ହୋଇଛନ୍ତି। ତାଙ୍କୁ ପୂର୍ବରୁ ମହମ୍ମଦ ସାମି, ଅବଦୁଲ ରଜାକ, ଓ୍ବାସିମ ଆକ୍ରମ ଟେଷ୍ଟରେ ହ୍ୟାଟ୍ରିକ ଅର୍ଜନ କରିବାର ସୁଯୋଗ ହାସଲ କରିଛନ୍ତି।
