କୁଆଲାଲମ୍ପୁର,୨୧ା୮: ମାଲେସିଆରେ ରହୁଥିବା ବିବାଦୀୟ ଭାରତୀୟ ଇସ୍ଲାମ ଧର୍ମ ପ୍ରଚାରକ ଜାକିର ନାଏକ ତାଙ୍କର ବର୍ଣ୍ଣବୈଷମ୍ୟ ମନ୍ତବ୍ୟ ପାଇଁ ମଙ୍ଗଳବାର କ୍ଷମା ମାଗିଛନ୍ତି। ତେବେ ସେ ଜାତିବାଦୀ ନୁହନ୍ତି ବୋଲି କହିଛନ୍ତି। ସମାଲୋଚକମାନେ ତାଙ୍କ ମନ୍ତବ୍ୟର ଭୁଲ୍ ତଥ୍ୟ ଉପସ୍ଥାପନ କରିଛନ୍ତି। କୌଣସି ଧର୍ମ କିମ୍ବା ବ୍ୟକ୍ତିବିଶେଷଙ୍କୁ ଅସନ୍ତୁଷ୍ଟ କରିବା ତାଙ୍କର ଉଦ୍ଦେଶ୍ୟ ନୁହେଁ ବୋଲି ଜାକିର କହିଛନ୍ତି।
ସର୍ବସାଧାରଣରେ ତାଙ୍କର ବକ୍ତବ୍ୟ ଉପରେ ମାଲେସିଆ ପୋଲିସ ନିଷେଧାଦେଶ ଲଗାଇବା ସହ ସୋମବାର ୧୦ ଘଣ୍ଟା ଜେରା କରିଥିଲା। ଭାରତରେ ତାଙ୍କ ବିରୋଧରେ ଉତ୍ତେଜନାପୂର୍ଣ୍ଣ ଭାଷଣ ଦେବା ଓ ମନିଲଣ୍ଡରିଂ ମାମଲାର ବିଚାର ଚାଲିଥିବାବେଳେ ସେ ମାଲେସିଆ ପଳାଇଥିଲେ। ସେଠାରେ ସେ ଜାତିଆଣ ମନ୍ତବ୍ୟ ଦେଇ ବିବାଦ ଘେରକୁ ଆସିଛନ୍ତି। ଭାରତର ସଂଖ୍ୟାଲଘୁ ମୁସଲମାନଙ୍କ ତୁଳନାରେ ମାଲେସିଆରେ ହିନ୍ଦୁମାନଙ୍କର ଅଧିକାର ୧୦୦ ଗୁଣ ଅଧିକ ବୋଲି ଜାକିର ମନ୍ତବ୍ୟ ଦେଇଥିଲେ। ଜାତି ଓ ଧର୍ମ ମାଲେସିଆରେ ଅତ୍ୟନ୍ତ ସମ୍ବେଦନଶୀଳ ପ୍ରସଙ୍ଗ। ସେଠାର ୬୦ ପ୍ରତିଶତ ଲୋକ ମୁସଲମାନ ହୋଇଥିଲାବେଳେ ଅବଶିଷ୍ଟ ଚାଇନା ଓ ଭାରତୀୟ। ସେମାନଙ୍କ ମଧ୍ୟରୁ ଅଧିକାଂଶ ହିନ୍ଦୁ। ପ୍ରକାଶ ଯେ, ଜାକିରଙ୍କ ନାଗରିକତ୍ୱ ରଦ୍ଦ ପାଇଁ ମାଲେସିଆର ୫ କ୍ୟାବିନେଟ ମନ୍ତ୍ରୀ ପ୍ରଧାନମନ୍ତ୍ରୀ ମହାଥିର ମହମ୍ମଦଙ୍କୁ ପତ୍ର ଲେଖିଥିଲେ।
