ମୁମ୍ବାଇ: ବଲିଉଡ୍ର କିଙ୍ଗ୍ଖାନ୍ ଶାହାରୁଖ୍ ଖାଁ ଦୀର୍ଘଦିନ ଧରି ବଡ଼ପରଦାରୁ ଦୂରେଇ ରହିଛନ୍ତି। ୨୦୧୮ରେ ‘ଜିରୋ’ ପରଠାରୁ ସେ କୌଣସି ଫିଲ୍ମରେ ଏ ପର୍ଯ୍ୟନ୍ତ ଅଭିନୟ କରିନାହାନ୍ତି। ଦୀର୍ଘ ସମୟ ଧରି ତାଙ୍କ ପ୍ରଶଂସକମାନେ ତାଙ୍କର ଆଗାମୀ ପ୍ରୋଜେକ୍ଟ ବିଷୟରେ ତାଙ୍କୁ ପଚାରିଚାଲିଛନ୍ତି। ଶାହାରୁଖ୍ ମଧ୍ୟ ତାଙ୍କ ଆଗାମୀ ପ୍ରୋଜେକ୍ଟ ବିଷୟରେ ସୋସିଆଲ ମିଡିଆରେ ଶେୟାର କରୁଛନ୍ତି। ବର୍ତ୍ତମାନ ତାଙ୍କ ଆଗାମୀ ଫିଲ୍ମ ବିଷୟରେ ଅନେକ କଥା ଶୁଣିବାକୁ ମିଳୁଛି।
ଶୁଣିବାକୁ ମିଳିଥିଲା ଯେ, ଶାହାରୁଖ ରାଜକୁମାର ହିରାନୀଙ୍କ ସହ ଆଗାମୀ ପ୍ରୋଜେକ୍ଟ ପାଇଁ ପ୍ରସ୍ତୁତ ହେଉଛନ୍ତି। ଏହା ଖୁବ୍ଶୀଘ୍ର ସରକାରୀ ଭାବେ ଘୋଷଣା କରାଯିବ। ତେବେ ଏପର୍ଯ୍ୟନ୍ତ କୌଣସି ସୂଚନା ପ୍ରକାଶ ପାଇନାହିଁ। ବର୍ତ୍ତମାନ କୁହାଯାଉଛି, ଶାହରୁଖ ଆର୍. ମାଧବନଙ୍କ ଫିଲ୍ମ ‘ରକେଟ୍ରି’ରେ ଅଭିନୟ କରିପାରନ୍ତି। ତେବେ ଶାହାରୁଖ ଏହି ଫିଲ୍ମରେ ଜଣେ ଖବରଦାତା ଭୂମିକାରେ ନଜର ଆସିବେ ବୋଲି ଶୁଣିବାକୁ ମିଳୁଛି।
କହିରଖୁଛୁ, ଗତବର୍ଷ ଶାହାରୁଖଙ୍କ ଜନ୍ମଦିନ ଅବସରରେ ପ୍ରଶଂସକଙ୍କ ସହ କଥା ହେଉଥିବା ବେଳେ ତାଙ୍କୁ ପଚରାଯାଇଥିବା ଏକ ପ୍ରଶ୍ନର ଉତ୍ତର ଦେଇ ସେ କହିଥିଲେ ତାଙ୍କର ଗୋଟିଏ ଫିଲ୍ମ ନିଶ୍ଚିତ ଭାବରେ ୨୦୨୦ ମସିହାରେ ଆସିବ। ଆଉ ଏହି ଫିଲ୍ମ ବିଷୟରେ ଖୁବ୍ଶୀଘ୍ର ସରକାରୀ ଘୋଷଣା କରାଯିବ।
