ବଲାଙ୍ଗୀର ଅଫିସ,୨୨ା୮: ମୁଖ୍ୟ ଶାସନ ସଚିବ ଅସିତ କୁମାର ତ୍ରିପାଠୀ ବୁଧବାର ବଲାଙ୍ଗୀର ଜିଲା ଗସ୍ତରେ ଆସିବାର କାର୍ଯ୍ୟକ୍ରମ ଥିଲା । ସକାଳ ପ୍ରାୟ ସାଢ଼େ ୭ଟାରୁ ଭୁବନେଶ୍ୱର ବିମାନବନ୍ଦରରୁ ସେ ଏକ ବିମାନରେ ବଲାଙ୍ଗୀର ଜିଲା ତୁଷରା ଅଭିମୁଖେ ଆସିଥିଲେ। ହେଲେ ଖରାପ ପାଗ କାରଣରୁ ତୁଷରା ଉଡାଜାହାଜ ପଡିଆରେ ତାଙ୍କ ବିମାନ ଅବତରଣ କରି ନ ପାରିବାରୁ ସେ ଆକାଶମାର୍ଗରୁ ଭୁବନେଶ୍ୱର ଫେରିଯାଇଥିବା ଜଣାପଡିଛି। ମୁଖ୍ୟ ଶାସନ ସଚିବ ତ୍ରିପାଠୀ ବୁଧବାର ପ୍ରଥମ କରି ନିଜ ଜନ୍ମଭୂମି ବଲାଙ୍ଗୀର ଜିଲା ଗସ୍ତରେ ଆସୁଥିଲେ । ସକାଳ ୮ଟା ୧୫ ମିନିଟ୍ରେ ତାଙ୍କ ବିମାନ ତୁଷରା ଉଡାଜାହାଜ ପଡିଆରେ ଅବତରଣ କରିବା ପାଇଁ ସମୟ ଧାର୍ଯ୍ୟ ହୋଇଥିଲା। ମାତ୍ର ଖରାପ ପାଗ କାରଣରୁ ବିମାନଟି ଅବତରଣ କରିପାରି ନ ଥିଲା। ପରେ କଳାହାଣ୍ଡି ଜିଲା ଉତ୍କେଲା ଉଡାଜାହାଜ ପଡିଆରେ ବିମାନ ଅବତରଣ କରିବାକୁ ଚେଷ୍ଟା କରାଯାଇଥିଲା । ସେଠାରେ ମଧ୍ୟ ପାଗ ଖରାପ ଯୋଗୁ ସେହି ପରିସ୍ଥିତି ସୃଷ୍ଟି ହୋଇଥିଲା।ଶେଷରେ ପାଇଲଟ ବିମାନକୁ ଭୁବନେଶ୍ୱର ଫେରାଇ ନେଇଥିଲେ । ମୁଖ୍ୟ ଶାସନ ସଚିବଙ୍କୁ ସ୍ବାଗତ କରିବା ପାଇଁ ଜିଲାପାଳ ଅରିନ୍ଦମ ଡାକୁଆ, ଏସ୍ପି କେ.ଶିବା ସୁବ୍ରମଣି ଓ ଅନ୍ୟ ଅଧିକାରୀମାନେ ତୁଷରା ଉଡାଜାହାଜ ପଡ଼ିଆରେ ଅପେକ୍ଷା କରିଥିଲେ । ମୁଖ୍ୟ ଶାସନ ସଚିବଙ୍କ ସହ ସେହି ବିମାନରେ ଜଳସମ୍ପଦ ବିଭାଗ ପ୍ରଧାନ ସଚିବ ପି.କେ. ଜେନା, ସ୍ବତନ୍ତ୍ର ରିଲିଫ କମିଶନର ବିଷ୍ଣୁପଦ ସେଠୀ ଥିଲେ। ଏଥିଯୋଗୁ ବଲାଙ୍ଗୀର ଏନ୍ଏଚ୍ଏମ୍ ସମ୍ମିଳନୀ କକ୍ଷରେ ଆୟୋଜିତ ହେବାକୁ ଥିବା ସମୀକ୍ଷା ବୈଠକକୁ ବାତିଲ କରାଯାଇଥିଲା।
