ବେଙ୍ଗାଲୁରୁ, ୩।୬ (ପି.ଟି.): ଦେଶର ସର୍ବୋଚ୍ଚ କ୍ରୀଡ଼ା ପୁରସ୍କାର ରାଜୀବ ଗାନ୍ଧୀ ଖେଳରତ୍ନ ପାଇଁ ହକି ଇଣ୍ଡିଆ ଭାରତୀୟ ଅଧିନାୟିକା ରାନୀ ରାମପଲଙ୍କ ନାମ ସୁପାରିସ କରିଛି। ରାଣୀ ଏ ନେଇ ପ୍ରତିକ୍ରିୟା ପ୍ରକାଶ କରି ଖୁସି ଜାହିର କରିଛନ୍ତି। ଭଲ ଖେଳିବା ଓ ନୂଆ ଲକ୍ଷ୍ୟ ହାସଲ କରିବା ପାଇଁ ଏହା ମୋତେ ଉତ୍ସାହିତ କରିବ ବୋଲି ରାନୀ କହିଛନ୍ତି। ମଙ୍ଗଳବାର ଖେଳରନତ୍ ପାଇଁ ରାନୀଙ୍କ ନାମ, ଅର୍ଜୁନ ପୁରସ୍କାର ଲାଗି ଦୁଇ ମହିଳା ହକି ଖେଳାଳି ବନ୍ଦନା କାଟାରିୟା, ମୋନିକା ଓ ପୁରୁଷ ହକି ଖେଳାଳି ହରମନପ୍ରୀତ ସିଂଙ୍କ ନାମ ହକି ଇଣ୍ଡିଆ ସୁପାରିସ୍ କରିଥିଲା।
ଖେଳରତ୍ନ ପୁରସ୍କାର ପାଇଁ ହକି ଇଣ୍ଡିଆ ମୋ ନାମ ସୁପାରିସ କରିଥିବାରୁ ବହୁତ ଖୁସି ବୋଲି ରାନୀ କହିଛନ୍ତି। ଏହା ମୋତେ ଓ ପୂରା ଦଳକୁ ଉତ୍ସାହିତ କରିବ। ଅର୍ଜୁନ ପୁରସ୍କାର ପାଇଁ ବନ୍ଦନା ଓ ମୋନିକା ଯୋଗ୍ୟ ଓ ଏଥିପାଇଁ ଏହି ଦୁଇ ଷ୍ଟ୍ରାଇକରଙ୍କୁ ଅଭିନନ୍ଦନ ଜଣାଉଛି। ଏହା ନିଶ୍ଚିତ ଭାବେ ଆମକୁ ଉତ୍ସାହିତ କରିବ ବୋଲି ସେ କହିଛନ୍ତି। ୨୦୧୬ ରିଓ ଅଲିମ୍ପିକ୍ସ ଆମ ପାଇଁ ଟର୍ନିଂ ପଏଣ୍ଟ ସାବ୍ୟସ୍ତ ହୋଇଛି। ଅଲିମ୍ପିକ୍ସରେ ଆମ ପ୍ରଦର୍ଶନ ଭଲ ହୋଇ ନ ଥିଲା। ଏଥିରୁ ଆମେ ଶିକ୍ଷା ଲାଭ କରିଛୁ। ଆଗକୁ ଅନ୍ୟ ବିଶ୍ୱସ୍ତରୀୟ ଟୁର୍ନାମେଣ୍ଟରେ କିଭଳି ଖେଳିବାକୁ ହେବ ତାହା ଆମକୁ ଏବେ ଜଣା ଅଛି। ଭାରତ ଏବେ ସାରା ବିଶ୍ୱରେ ଏକ ଶକ୍ତିଶାଳୀ ଦଳ ଭାବେ ଉଭା ହୋଇଛି।
ଦଳରେ ଆସିଥିବା ଦୃଷ୍ଟାନ୍ତମୂଳକ ପରିବର୍ତ୍ତନ ଓ ସଫଳତା ପାଇଁ ସେ କୋଚ୍ ଜୋଏର୍ଡ ମାରିଜନେଙ୍କୁ ଶ୍ରେୟ ଦେଇଛନ୍ତି। ତାଙ୍କ ତତ୍ତ୍ୱାବଧାନରେ ଦଳର ଆତ୍ମବିଶ୍ୱାସ ଫେରିପାଇବାରେ ସକ୍ଷମ ହୋଇଛି। ମାରିଜନେଙ୍କ ନେତୃତ୍ୱରେ ଏକ ଦକ୍ଷ ସପୋର୍ଟଷ୍ଟାଫମାନେ ମଧ୍ୟ ପରିଶ୍ରମ କରିବା ସହ ବେଶ୍ ଭଲ କାମ କରୁଛନ୍ତି। ସାହସିକ ଖେଳ ପ୍ରଦର୍ଶନ କରିବା ପାଇଁ ମାରିଜନେ ଆମକୁ ସବୁବେଳେ ଉତ୍ସାହିତ କରିଆସିଛନ୍ତି। ଦଳର ସଫଳତାର ଶ୍ରେୟ ସପୋର୍ଟଷ୍ଟାଫ୍ଙ୍କୁ ମଧ୍ୟ ଦିଆଯିବା ଉଚିତ। ଦଳର ସବୁ ଖେଳାଳିଙ୍କୁ ସପୋର୍ଟ ଷ୍ଟାଫ୍ମାନେ ସବୁବେଳେ ସହାୟତା ପ୍ରଦାନ କରିଆସିଛନ୍ତି ବୋଲି ରାନୀ କହିଛନ୍ତି।
