ଦାରିଙ୍ଗବାଡ଼ି,୨୫।୧୦(ଡି.ଏନ.ଏ)- କନ୍ଧମାଳ ଜିଲା ଦାରିଙ୍ଗବାଡ଼ି-କ.ନୂଆଗଁା ସୀମାନ୍ତବର୍ତ୍ତୀ କନ୍ଦିବାନ୍ଦା ନିକଟରେ ମାଓବାଦୀମାନେ ଗୁରୁବାର ସନ୍ଧ୍ୟା ପ୍ରାୟ ସାଢେ ୭ଟାରେ ଗଛ ପକାଇ ରାସ୍ତା ଅବରୋଧ କରିଛନ୍ତି। ଘଟଣାସ୍ଥଳରେ ୨ଟି ଲାଲ୍ ବ୍ୟାନର ଓ ଏକାଧିକ ପୋଷ୍ଟର ଛାଡ଼ିଛନ୍ତି। ତେବେ ଅଞ୍ଚଳରେ ପ୍ରବଳ ବର୍ଷା ଲାଗି ରହିଥିବା ସହ ଅନ୍ଧାର ଯୋଗୁ ଉକ୍ତ ବ୍ୟାନର ଏବଂ ପୋଷ୍ଟରରେ ଉଲ୍ଲେଖ କରିଥିବା କୌଣସି ବିଷୟ ଜଣାପଡୁନାହିଁ। ଦୀର୍ଘଦିନ ଧରି ମାଓବାଦୀଙ୍କ ନୀରବତା ପରେ ପୁଣି ସେମାନେ ଉପସ୍ଥିତି ଜାହିର କରିଛନ୍ତି। ରାସ୍ତା ଅବରୋଧ ଯୋଗୁ ଗାଡ଼ିମୋଟର ସହ ଆମ୍ବୁଲାନ୍ସ ମଧ୍ୟ ଗଛ ପଡ଼ିଥିବା ସ୍ଥାନରୁ ଫେରିଆସିଛି। ଲୋକଙ୍କ ଉକ୍ତ ରାସ୍ତାରେ ଯାତାୟାତ ବନ୍ଦ ହୋଇଯିବା ସହ ଅଞ୍ଚଳରେ କୋକୁଆ ଭୟ ଖେଳିଯାଇଛି। ଦାରିଙ୍ଗବାଡ଼ିରୁ ବାଲିଗୁଡ଼ା, ଫୁଲବାଣୀ, ଭବାନୀପାଟଣା ଓ ରାୟପୁର ଆଦି ଅଞ୍ଚଳକୁ ଯାତାୟାତ ବନ୍ଦ ହୋଇଯାଇଛି।
ସେହିପରି ଗୋପାଳପୁର ଠାରୁ ରାୟପୁରକୁ ସଂଯୋଗ କରୁଥିବା ଜାତୀୟ ରାଜପଥ ନଂ.୫୯ କୁର୍ତ୍ତମଗଡ ନିକଟ ୧୫ ମାଇଲଠାରେ ମଧ୍ୟ ମାଓବାଦୀମାନେ ଗଛକାଟି ରାସ୍ତାରେ ପକାଇ ଅବରୋଧ କରିଛନ୍ତି।
