ଗଞ୍ଜାମ

ଗଞ୍ଜାମର ୨୭୬୩ ଅଙ୍ଗନୱାଡି କେନ୍ଦ୍ରରେ ନାହିଁ ପାଣି
7:52 amFebruary 9, 2020February 9, 2020 / 21

ଛତ୍ରପୁର,୯ା୨(ଡି.ଏନ.ଏ.)-ଗଞ୍ଜାମ ଜିଲାର ୨୭୬୩ ଅଙ୍ଗନୱାଡି କେନ୍ଦ୍ରରେ ପାନୀୟ ଜଳ ସୁବିଧା ନାହିଁ । ଜିଲାରେ ରହିଛି ୫୧୪୧ ଅଙ୍ଗନୱାଡି କେନ୍ଦ୍ର । ଏଥିରୁ ୨୩୭୮ ଅଙ୍ଗନୱାଡି କେନ୍ଦ୍ରରେ ପାନୀୟଜଳ ର ସୁବିଧା ଅଛି । ଜିଲା ସମାଜ ମଙ୍ଗଳ ବିଭାଗ ପକ୍ଷରୁ ଡିଆରଡିଏ କାର୍ଯ୍ୟାଳୟକୁ ଦିଆଯାଇଥିବା ତଥ୍ୟ ଅନୁସାରେ ଜିଲାରେ ୪୫୮୧ ଅଙ୍ଗନୱାଡି କେନ୍ଦ୍ର କୋଠା ନିର୍ମାଣ ପାଇଁ ଅନୁଦାନ ଆସିଥିଲା । ଏଥିରୁ ୨୯୮୨ ଅଙ୍ଗନୱାଡି କେନ୍ଦ୍ର କୋଠା ନିର୍ମାଣ କାମ ସରିଛି । ଅପରପକ୍ଷରେ ଜିଲାର ୧୫୯୯ ଅଙ୍ଗନୱାଡି କେନ୍ଦ୍ର ଏବେବି ଅସ୍ଥାୟୀ କୋଠାରେ ଚାଲିଛି । କେଉଁଠି କୋଠଘର ତ କେଉଁଠି ସ୍କୁଲ ଆଉ ଭଡାରେ ଏହି କେନ୍ଦ୍ର ରହିଛି । ୭୯୭ ଅଙ୍ଗନୱାଡି କେନ୍ଦ୍ର କୋଠା ନିର୍ମାଣ ଚାଲିଥିବା ବେଳେ ୮୦୨ କେନ୍ଦ୍ର କୋଠା ନିର୍ମାଣ ଆରମ୍ଭ ହୋଇନି । ଚଳିତ ସପ୍ତାହରେ ରାଜ୍ୟ ଶିଶୁ ସୁରକ୍ଷା ଆୟୋଗ ମଧ୍ୟ ଛତ୍ରପୁର ଆସି ଏହି ସବୁର ସମୀକ୍ଷା କରିଛନ୍ତି । ଏଥିସହ ୟୁନିସେଫ୍‌ର ଏକ ଟିମ୍‌ ମଧ୍ୟ ଜିଲାକୁ ଆସି ଅନୁଧ୍ୟାନ କରି ଫେରିଛନ୍ତି । ଜିଲାର ୨ ହଜାର ୫୫୩ ଅଙ୍ଗନୱାଡି କେନ୍ଦ୍ରରେ ରୋଷେଇ ଘର ରହିଛି । ଏଥିସହ ଜିଲାର ୫୧୪୧ ଅଙ୍ଗନୱାଡି କେନ୍ଦ୍ର ମଧ୍ୟରୁ ୨୦୪୦ ଅଙ୍ଗନୱାଡି କେନ୍ଦ୍ରରେ ପାଇଖାନା ଓ ୪୧୧ କେନ୍ଦ୍ରରେ ବିଦ୍ୟୁତ୍‌ ସଂଯୋଗ ରହିଛି ।