ଛେଣ୍ଡିପଦା,୩।୨(ସ୍ବ.ପ୍ର.): ଅନୁଗୋଳ ଜିଲା ଛେଣ୍ଡିପଦା ବ୍ଲକ ପାତ୍ରପଡା ପଞ୍ଚାୟତର ଗଡ଼ମଣ୍ଡଳ ସରସ୍ବତୀ ଶିଶୁମନ୍ଦିର କାର୍ଯ୍ୟାଳୟ ତାଲାଭାଙ୍ଗି ରବିବାର ବିଳମ୍ବିତ ରାତିରେ ଚୋରି ହୋଇଥିବା ନେଇ ସୋମବାର ଛେଣ୍ଡିପଦା ଥାନାରେ ଅଭିଯୋଗ ହୋଇଛି ।
ପ୍ରକାଶ ଯେ, ଶିକ୍ଷକ ଦେବରାଜ ସାହୁ ସବୁଦିନ ପରି ସୋମବାର ସକାଳୁ ସରସ୍ବତୀ ଶିଶୁ ମନ୍ଦିରକୁ ଟ୍ୟୁସନ କରିବା ପାଇଁ ଆସିଥିଲେ । ସେ ଶିଶୁ ମନ୍ଦିର କାର୍ଯ୍ୟାଳୟର ତାଲା ଭଙ୍ଗାଯାଇଥିବା ଦେଖିବାକୁ ପାଇଥିଲେ। ଏ ନେଇ ଦେବରାଜ ଘଟଣା ସମ୍ପର୍କରେ ଶିଶୁମନ୍ଦିରର ପ୍ରଧାନ ଗୁରୁଜୀ ଜଗବନ୍ଧୁ ସାହୁ ଓ ସମ୍ପାଦକ ସୁଶିଲ କୁମାର ସାହୁଙ୍କୁ ଜଣାଇଥିଲେ । ପ୍ରଧାନ ଗୁରୁଜୀ ଓ ସମ୍ପାଦକ ଶିଶୁମନ୍ଦିର କାର୍ଯ୍ୟାଳୟରେ ପହଞ୍ଚିଥିଲେ। ଦୁର୍ବୃତ୍ତ ତାଲା ଭାଙ୍ଗି ଭିତରେ ପଶି ଆଲମାରୀ ଭାଙ୍ଗି ସେଥିରୁ ୨୦ହଜାର ଟଙ୍କା ନେଇ ପଳାଇଯାଇଥିବା ନେଇ ଛେଣ୍ଡିପଦା ଥାନାରେ ଅଭିଯୋଗ କରିଥିଲେ। ବାଗଡ଼ିଆ ଫାଣ୍ଡି ଅଧିକାରୀ ଅବଦୁଲ ୱାସିନ ଖାନ୍ ଘଟଣାସ୍ଥଳରେ ପହଞ୍ଚି ତଦନ୍ତ ଜାରି ରଖିଛନ୍ତି ।
