ଇସଲାମାବାଦ, ୧୩।୬: ପାକିସ୍ତାନରେ ଜୁଆ ଖେଳିବା ଅଭିଯୋଗରେ ଗିରଫ ହୋଇଥିବା ଗଧକୁ ଜାମିନ ମିଳିଛି। ଦକ୍ଷିଣ ପାକିସ୍ତାନରେ ଗଡ଼ ଦୌଡ଼ ଉପରେ ଜୁଆ ଖେଳ ହେଉଥିବା ଖବର ପାଇ ପୋଲିସ ପକ୍ଷରୁ ଚଢ଼ାଉ କରାଯାଇଥିଲା। ଜୁଆ ଖେଲୁଥିବା ଅଭିଯୋଗରେ ୮ ଜଣଙ୍କୁ ଗିରଫ କରାଯାଇଥିବା ସ୍ଥାନୀୟ ପୋଲିସ ଷ୍ଟେଶନ ଅଧିକାରୀ ରହିମାୟାର ଖାଁ ସୂଚନା ଦେଇଛନ୍ତି। ୪୦ ସେକେଣ୍ଡରେ ୬୦୦ ମିଟର ଗଡ଼ ଦୌଡ଼ ପାଇଁ ଜୁଆ ଖେଳ ହେଉଥିଲା। ଘଟଣାସ୍ଥଳରେ ପୋଲିସ ପହଞ୍ଚି ଲକ୍ଷେ ୨୧ ହଜାର ପାକିସ୍ତାନୀ ମୁଦ୍ରା ଜବତ କରିଥିଲେ। ଏଠାରେ ଥିବା ଗଧ ଏବଂ ମାଲିକ ଗୁଲାମ ମୁସ୍ତଫାଙ୍କୁ ଗିରଫ କରାଯାଇଥିଲା। ୪ ଦିନ ପରେ ଅଭିଯୁକ୍ତମାନଙ୍କୁ ଏବଂ ଗଧକୁ ଜାମିନରେ ଛାଡ଼ି ଦିଆଯାଇଥିଲା। ପ୍ରକୃତ ପକ୍ଷେ ମାଲିକ ଥାନାରେ ଥିବାରୁ ଗଧକୁ ବାଧ୍ୟ ହୋଇ ଥାନା ପରିସରରେ ଥିବା ପଡ଼ିଆରେ ବାନ୍ଧି ରଖାଯାଇଥିଲା। ତେବେ ଗଧକୁ ଗିରଫ କରିବା ଘଟଣାକୁ ନେଇ ସୋସିଆଲ୍ ମିଡ଼ିଆରେ ପାକିସ୍ତାନୀ ପୋଲିସକୁ ଟ୍ରୋଲ୍ ହେବାକୁ ପଡ଼ିଛି।
