ବୌଦ୍ଧ,୩୧ା୫(ସ୍ବ.ପ୍ର.): ବୌଦ୍ଧ ଜିଲା ହରଭଙ୍ଗା ବ୍ଲକ ମହାନଦୀର କୁଶାସିଙ୍ଗା ଘାଟରେ ଗାଧୋଇବା ବେଳେ ଦୁଇ ଛାତ୍ରଙ୍କ ଜୀବନ ଯାଇଥିବା ଜଣାପଡ଼ିଛି। ସୂଚନାନୁଯାୟୀ, ହରଭଙ୍ଗା ବ୍ଲକ ଅରଖପଦର ଗ୍ରାମର ୫ ଜଣ ପିଲା ଗାଧୋଇବା ପାଇଁ କୁଶାସିଙ୍ଗା ଘାଟକୁ ରବିବାର ପୂର୍ବାହ୍ନରେ ଯାଇଥିଲେ। ଗାଧୋଇବା ସମୟରେ ମହାନଦୀ ପାଣିର ଭଉଁରୀରେ ନକୁଳ ପ୍ରଧାନଙ୍କ ୧୦ମ ଶ୍ରେଣୀରେ ପଢୁଥିବା ପୁଅ ତୋଫାନ ଓ ଶରତ ପ୍ରଧାନଙ୍କ ଯୁକ୍ତ ତିନିରେ ପଢୁଥିବା ପୁଅ ଆଶିଷ ଭଉଁରୀରେ ପଡ଼ିଯାଇଥିଲେ। ସେମାନେ ପାଣିରୁ ନ ବାହାରିବାରୁ ଅନ୍ୟ ପିଲାମାନେ ଗାଁରେ ଆସି ଖବର ଦେଇଥିଲେ। ଗ୍ରାମବାସୀ ଘଟଣାସ୍ଥଳକୁ ଯିବା ସହ ଅଗ୍ନିଶମ ବାହିନୀକୁ ଖବର ଦେଇଥିଲେ। ଅଗ୍ନିଶମ କର୍ମଚାରୀମାନେ ପହଞ୍ଚିବା ବେଳକୁ ଗ୍ରାମବାସୀ ଦୁଇ ଛାତ୍ରଙ୍କୁ ଉଦ୍ଧାର କରିସାରିଥିଲେ। ଗ୍ରାମବାସୀ ଦୁଇଜଣଙ୍କୁ ହରଭଙ୍ଗା ଡାକ୍ତରଖାନା ନେଇଥିବା ବେଳେ ସେଠାରେ ଡାକ୍ତର ଉଭୟଙ୍କୁ ମୃତ ଘୋଷଣା କରିଛନ୍ତି। ଘଟଣାସ୍ଥଳରେ ହରଭଙ୍ଗା ପୋଲିସ ପହଞ୍ଚି ମୃତଦେହ ଦୁଇଟି ଜବତ କରି ବ୍ୟବଚ୍ଛେଦ ପାଇଁ ପଠାଇଥିବା ଜଣାପଡ଼ିଛି।
