ଥିରୁଭାନନ୍ଥପୁରମ୍: ଗତବର୍ଷ ଯାହାଙ୍କ ଆଖିମରା ଦୃଶ୍ୟ ଲକ୍ଷଲକ୍ଷ ଦର୍ଶକଙ୍କ ହୃଦୟକୁ ଜିଣିପାରିଥିଲା, ସେଇ ଚର୍ଚ୍ଚିତ ଅଭିନେତ୍ରୀ ହେଉଛନ୍ତି ପ୍ରିୟା ପ୍ରକାଶ ବାରିୟର। ସେ ଆଗାମୀ ମାଲାୟାଲମ୍ ଫିଲ୍ମ ‘ଫାଇନାଲ୍ସ’ର ଏକ ସଂଗୀତରେ ସ୍ବର ଦେଇଛନ୍ତି। ସେ ତାଙ୍କ ପ୍ରତିକ୍ରିୟାରେ କହନ୍ତି, ‘ମୋର ପ୍ରଥମ ଉଦ୍ୟମ (ଆଖିମରା ଦୃଶ୍ୟ)ରେ ଆପଣମାନେ ଖୁସି ହୋଇଥିବାରୁ ହୃଦୟର ଗଭୀରତମ ପ୍ରଦେଶରୁ କୃତଜ୍ଞତା ଜଣାଉଛି। ମୋ ବାୟୋଡାଟା ଲିଙ୍କ୍ ସହ କ୍ଲିକ୍ କରି ଉପରୋକ୍ତ ସିନେମା ସଂଗୀତର ସମ୍ପୂର୍ଣ୍ଣ ଭିଡିଓ ଦେଖିପାରିବେ।’
ଏହି ଅଭିନେତ୍ରୀ ‘ଓ୍ବିଙ୍କ ଆଣ୍ଡ ଫାୟାର ଗନ୍’ କିସ୍ ସିନ୍ରେ ଆଖିମାରି ଲକ୍ଷଲକ୍ଷ ପ୍ରଶଂସକଙ୍କ ହୃଦୟକୁ ଯେଭଳି ପ୍ରେମତୀର ମାରି ଦେଇଥିଲେ, ସେଥିପାଇଁ ସେ ଖୁବଶୀଘ୍ର ଚର୍ଚ୍ଚିତ ହୋଇଯାଇଥିଲେ। ଏହା ଥିଲା ଓମାର ଲୁଲୁଙ୍କ ନିର୍ଦ୍ଦେଶିତ ‘ଓରୁ ଆଦାର ଲଭ୍’ର ଏକ ରୋମାଣ୍ଟିକ୍ ଦୃଶ୍ୟ। ତାଙ୍କର ଆଖିମରା ଦୃଶ୍ୟ ସୋସିଆଲ୍ ମିଡିଆରେ ଭାଇରାଲ ହୋଇ ଖୁବ୍ ପ୍ରଶଂସା ସାଉଁଟିଥିଲା। ଆଗାମୀ ଫିଲ୍ମ ‘ଶ୍ରୀଦେବୀ ବଙ୍ଗାଲୋ’ରେ ପ୍ରିୟା ପ୍ରଥମକରି ଅଭିନୟ କରିବାକୁ ଯାଉଛନ୍ତି। ଏହାର ନିର୍ଦ୍ଦେଶନା ଦେଉଛନ୍ତି ପ୍ରଶାନ୍ତ ମାମ୍ବୁଲି।
