ଶାନ୍ତନୁ ଏବଂ ଶାଲିନୀ ଦୁଇ ଜଣ ସାଙ୍ଗ। ଦିନେ ହଠାତ୍ ଶାଲିନୀ ଅନ୍ତର୍ଦ୍ଧାନ ହୋଇଯାଉଛି। ତାକୁ କିପରି ଠାବ କରିବ ସେଥିପାଇଁ ଶାନ୍ତନୁ ନିଜ ଜୀବନକୁ ବାଜି ଲଗାଇ ଦେଇଛି। ତା’ପରେ କ’ଣ ଘଟୁଛି ଏବଂ ଶାଲିନୀକୁ ଶାନ୍ତନୁ ପାଉଛି କି ନାହିଁ ସେପରି ଏକ ଉତ୍କଣ୍ଠାପୂର୍ଣ୍ଣ କାହାଣୀକୁ ଆଧାରକରି ନିର୍ମିତ ହୋଇଛି କଳାତ୍ମକ ଚଳଚ୍ଚିତ୍ର ‘ଅନ୍ତର୍ଧ୍ୱନୀ’। ଜଙ୍ଗଲ ଏବଂ ପ୍ରାକୃତିକ ବାତାବରଣର ଛାପ ଏଥିରେ ମଧ୍ୟ ରହିଛି। ଖାସ୍ କଥା ହେଲା, ଏହାର ୯୫ ପ୍ରତିଶତ ଶୁଟିଂ କେବଳ ଜଙ୍ଗଲରେ ହିଁ ହୋଇଛି। ପୁଣି ସମ୍ପୂର୍ଣ୍ଣ ପ୍ରାକୃତିକ ଆଲୋକରେ ଶୁଟିଂ କରାଯାଇଛି। ଅନ୍ତର୍ଜାତୀୟ ଖ୍ୟାତିସମ୍ପନ୍ନ ନିର୍ଦ୍ଦେଶକ ଅପୂର୍ବ କୁମାର ବୀର ନିର୍ଦ୍ଦେଶନା ଦେଇଥିବା ବେଳେ ପ୍ରଯୋଜନା କରିଛନ୍ତି ରାକେଶ ମହାନ୍ତି। ଅକ୍ଟୋବର ୩୧ରୁ ନଭେମ୍ବର ୬ ପର୍ଯ୍ୟନ୍ତ ଅନୁଷ୍ଠିତ ହେବାକୁ ଥିବା ଗୁଆହାଟୀ ଫିଲ୍ମ ଫେଷ୍ଟିଭାଲରେ ଏହା ଓପନିଂ ଫିଲ୍ମ ଭାବରେ ପ୍ରଦର୍ଶିତ ହେବା ଯୋଜନା ରହିଛି। ଏହାପୂର୍ବରୁ କାନ୍ସ ଫିଲ୍ମ ଫେଷ୍ଟିଭାଲରେ ଉକ୍ତ ସିନେମା ପ୍ରଦର୍ଶିତ ହୋଇ ପ୍ରଶଂସିତ ହୋଇଛି। ଆଗକୁ ବର୍ଲିନ ଫିଲ୍ମ ଫେଷ୍ଟିଭାଲ ଏବଂ ଲୋକାର୍ନୋ ଫିଲ୍ମ ଫେଷ୍ଟିଭାଲରେ ଫିଲ୍ମଟି ପ୍ରଦର୍ଶିତ ହେବ ବୋଲି ପ୍ରଯୋଜନା ସଂସ୍ଥା ପକ୍ଷରୁ ସୂଚନା ଦିଆଯାଇଛି। ୨୪ ଏଫ୍ପିଏସ୍ ବ୍ୟାନରରେ ନିର୍ମିତ ‘ଅନ୍ତର୍ଧ୍ୱନୀ’ର ମୁଖ୍ୟ ଭୂମିକାରେ ଗୌରବ ପାଶଓ୍ବାଲ ଏବଂ ସ୍ବପ୍ନା ପତି ଅଭିନୟ କରିଛନ୍ତି।
