ବେଲପାହାଡ଼,୬।୬(ଡି.ଏନ୍.ଏ.)- ଝାରସୁଗୁଡ଼ା ଜିଲା ବେଲପାହାଡ଼ ଥାନା ପୋଲିସ ଗୁପ୍ତଧନ ପାଇଁ ତନ୍ତ୍ରପୂଜା କରୁଥିବା ଅଭିଯୋଗରେ ଜଣେ ମହିଳାଙ୍କ ସମେତ ୬ ଜଣଙ୍କୁ ଅଟକ ରଖି ପଚରାଉଚରା କରୁଛି। ଏମାନେ ଗତ ବୁଧବାର ରାତିରେ ଲିମଟିକିରା ଗାଁ ମୁଣ୍ଡରେ ଥିବା ଏକ ଭଙ୍ଗା ପରିତ୍ୟକ୍ତ ଗୃହରେ ପୂଜାର୍ଚ୍ଚନା କରୁଥିଲେ। ସେହି ସମୟରେ ଶିଶୁବଳି ଦିଆଯାଉଥିବା ଗୁଜବ ସୃଷ୍ଟି ହୋଇଥିଲା। ଉତ୍ତ୍ୟକ୍ତ ଗ୍ରାମବାସୀ ଘରକୁ ଘେରାଉ କରିବା ସହ ସେମାନଙ୍କୁ ମାଡ଼ ମାରିଥିଲେ। ପରେ ପୋଲିସ ପହଞ୍ଚି ଉକ୍ତ ୬ ଜଣଙ୍କୁ ଥାନାକୁ ଆଣିଥିଲା। ଅଟକଙ୍କ ମଧ୍ୟରେ ସମ୍ବଲପୁର ସିନ୍ଦୂରପଙ୍କ ବାଦୀପାଲି ଗାଁର ଜଣେ (ପୂଜକ), ଝାରସୁଗୁଡା ବଞ୍ଜାରି ଗାଁର ଜଣେ, ଘିଚାମୁରା ଗାଁର ଜଣେ, ରାଜପୁର କଣ୍ଟାପାଲି ଗାଁର ଜଣେ ବ୍ୟକ୍ତି ଓ ଗୁମାଡେରା ଗାଁର ଏକ ଦମ୍ପତି ରହିଛନ୍ତି। ପୂଜକ ଜଣକ ପୋଲିଓଗ୍ରସ୍ତ ହୋଇଥିବାରୁ ଲୋକଙ୍କ ମନରେ ଜଣେ ଶିଶୁଙ୍କୁ ବଳି ଦିଆଯାଉଥିବା ଭ୍ରମ ସୃଷ୍ଟି ହୋଇଥିଲା ବୋଲି ପୋଲିସ ସନ୍ଦେହ କରୁଛି ।
