ବୁଗୁଡ଼ା,୨୬ା୪(ଡି.ଏନ.ଏ.)-ବୁଗୁଡ଼ା ଥାନା ଅନ୍ତର୍ଗତ କଇମ ନିକଟସ୍ଥ କୁବେରେଶ୍ୱର ମନ୍ଦିରରେ ଏପ୍ରିଲ୍ ୪ରେ ଗୁଳିମାଡରେ ଜଣେ ଯୁବକଙ୍କ ମୃତ୍ୟୁ ଘଟିଥିଲା। ବୁଗୁଡ଼ା ପୋଲିସ ଶନିବାର ଏହି ଘଟଣାରେ ୨ ଜଣଙ୍କୁ ଗିରଫ କରି କୋର୍ଟଚାଲାଣ କରିଛି। ଗିରଫ ଦୁଇଜଣ ହେଲେ ବୁଗୁଡ଼ାର ଧନୁ ସାହୁ ଓ ଭଗବାନ ସାହୁ। ତେବେ ମୁଖ୍ୟ ଅଭିଯୁକ୍ତ କୁହାଯାଉଥିବା ଜଗତପାଟଣା ଗ୍ରାମର ଅର୍ଜୁନ କର ଏବେବି ଫେରାର ଅଛନ୍ତି। ଏନେଇ ବୁଗୁଡ଼ା ଥାନାରେ ନଂ.୮୪/୨୦ରେ ଏକ ମାମଲା ରୁଜୁ ହୋଇଥିଲା। ପ୍ରକାଶ ଯେ ଏପ୍ରିଲ ୨ରୁ ନୟାଗଡ଼ ଜିଲା କଳାପଥର ଅନ୍ତର୍ଗତ ମାଣିକଗଡ଼ର ରଞ୍ଜନ କୁମାର ଦଳେଇ ଓ ତାଙ୍କ ଦୁଇଜଣ ସହଯୋଗୀ ଅର୍ଜୁନ କରଙ୍କ ଘରେ ରହୁଥିଲେ। ଅର୍ଜୁନଙ୍କ ଭଣଜା ଡ୍ରଗ୍ସ କାରବାରରେ ଗିରଫ ହୋଇ ଜେଲରେ ଥିବାବେଳେ ପୋଲିସକୁ ରଞ୍ଜନ ଭଣଜାକୁ ଧରାଇବାରେ ହାତ ଥିବା ସନ୍ଦେହ କରି ଅର୍ଜୁନ ଯୋଜନା ମୁତାବକ ବାଇକରେ ରଞ୍ଜନଙ୍କୁ କୁବେରେଶ୍ୱର ମନ୍ଦିର ନିକଟକୁ ନେଇଥିଲେ। ସେଠାକୁ ଫୋନ କଲ ପାଇ ଧନୁ ଓ ଭଗବାନ ମଧ୍ୟ ଯାଇଥିଲେ। ମନ୍ଦିରରେ ପ୍ରମାଣ କରିବାକୁ ନେଇ ରଞ୍ଜନ ଓ ଅର୍ଜୁନଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା। ଶେଷରେ ରାଗିଯାଇ ଅର୍ଜୁନ ପିସ୍ତଲ ବାହାର କରି ରଞ୍ଜନଙ୍କୁ ଗୁଳି କରି ଫେରାର ହୋଇଯାଇଥିଲେ। କଟକ ବଡ ମେଡିକାଲରେ ଚିକିତ୍ସା ଚାଲିଥିବାବେଳେ ରଞ୍ଜନଙ୍କ ମୃତ୍ୟୁ ହୋଇଥିଲା।
