କଟକ ଅଫିସ,୧୭ା୫-ଗ୍ରୀନ୍ ଜୋନ୍ରେ ଲକଡାଉନ କଟକଣା କୋହଳ ହେବା ପରେ କରୋନା ସଂକ୍ରମଣରେ ଆଶଙ୍କା ବଢ଼ିବାରେ ଲାଗିଛି। ଏହି ଜୋନ୍ରେ ମାସ୍କ ବ୍ୟବହାର ଓ ସାମାଜିକ ଦୂରତ୍ୱ ନିୟମକୁ କଡ଼ାକଡ଼ି କରିବାକୁ ସରକାରୀ ନିର୍ଦ୍ଦେଶ ରହିଛି। କିନ୍ତୁ ଏହି ଜୋନ୍ରେ ଉପରୋକ୍ତ ନିର୍ଦ୍ଦେଶ ସବୁ ବାରମ୍ବାର ଉଲ୍ଲଂଘନ ହେଉଥିବା ଦେଖିବାକୁ ମିଳୁଛି।
କଟକରେ ଲକ୍ଡାଉନ କଟକଣା କୋହଳ ହେବା ପରେ ଦୋକାନ ବଜାର ପୁନର୍ବାର ଖୋଲିଛି। ଏହି ପରିପ୍ରେକ୍ଷୀରେ କିଛି କଟକଣା ମଧ୍ୟ ଜାରି ହୋଇଛି। କଟକ ମହାନଗର ନିଗମ (ସିଏମ୍ସି) ବ୍ୟବସାୟ କ୍ଷେତ୍ରରେ ଲୋକଙ୍କୁ ସାମାଜିକ ଦୂରତ୍ୱ ରଖିବା ପାଇଁ ନିର୍ଦ୍ଦେଶ ମଧ୍ୟ ଦେଇଛି। କେହି ଦୋକାନୀ ନିୟମ ଭାଙ୍ଗିଲେ, ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ମଧ୍ୟ ନିଆଯାଉଛି। ସିଏମ୍ସି ଏନେଇ ଜରିମାନା ଆଦାୟ କରିବା ସହ ବହୁ ଦୋକାନ ସିଲ୍ କରିଛି। କିନ୍ତୁ ଏହି ଗାଇଡ୍ଲାଇନକୁ ଖୋଦ୍ ଅନେକ ସରକାରୀ ଅନୁଷ୍ଠାନ ମାନୁନାହାନ୍ତି। କଟକ ଜିଲାପାଳ କାର୍ଯ୍ୟାଳୟ, ସିଏମ୍ସିର ବିକାଶ ଭବନ ଓ ସହରରେ ଥିବା ବିଭିନ୍ନ ବ୍ୟାଙ୍କରେ ସାମାଜିକ ଦୂରତ୍ୱ ରକ୍ଷା କରାଯାଉନାହିଁ। ସିଏମ୍ସିର ଏନଫୋର୍ସମେଣ୍ଟ ଟିମ ଗତ ୧୦ ଦିନ ମଧ୍ୟରେ ୬ରୁ ଉର୍ଦ୍ଧ୍ୱ ଦୋକାନରେ ଚଢାଉ କରି ଜରିମାନା ଆଦାୟ କରିଛି। ସେହିପରି ମାସ୍କ ବ୍ୟବହାର କରୁ ନ ଥିବା ଲୋକଙ୍କଠାରୁ ୨ ଲକ୍ଷରୁ ଉର୍ଦ୍ଧ୍ୱ ଟଙ୍କା ଜରିମାନା ଆଦାୟ କରାଯାଇଛି। ଶୁକ୍ରବାର ଚୌଧୁରୀ ବଜାର, ଦୋଳମୁଣ୍ଡାଇ ଓ ନନ୍ଦୀସାହିର ୩ଟି ଦୋକାନ ଉପରେ ଚଢ଼ାଉ କରାଯାଇ ତାକୁ ସିଲ୍ କରାଯାଇଛି। ପୋଲିସ ମଧ୍ୟ ପ୍ରତିଦିନ ନିୟମ ଭାଙ୍ଗୁଥିବା ଚାଳକଙ୍କଠାରୁ ଜରିମାନା ଆଦାୟ କରୁଛି। ମାତ୍ର ଏବେ ସୁଦ୍ଧା କୌଣସି ସରକାରୀ ଅନୁଷ୍ଠାନରେ ଚଢ଼ାଉ ହେଉନାହିଁ। ସେଠାରେ ପ୍ରତିଦିନ ଲୋକଙ୍କ ଭିଡ଼ ହେବା ସହ ଏହା ଗ୍ରୀନ୍ ଜୋନ୍ ଥିବା କଟକରେ କରୋନା ସଂକ୍ରମଣର ଆଶଙ୍କାକୁ ବଢ଼ାଇଦେଉଛି।
