କୃଷ୍ଣପ୍ରସାଦ, ୧୯।୪ (ଡି.ଏନ.ଏ.): କରୋନା ଯୋଗୁ ଜାରି ହୋଇଥିବା ଲକ୍ଡାଉନ ଲାଗି ଶିକ୍ଷାର୍ଥୀଙ୍କ ପାଠପଢାରେ ଡୋରି ବନ୍ଧା ହୋଇଛି। ପାଠ ପଢିବାର ସୁଯୋଗ ସୃଷ୍ଟି କରିବା ପାଇଁ ଗଣଶିକ୍ଷା ବିଭାଗ ଶିକ୍ଷୟିତ୍ରୀଶିକ୍ଷକମାନେ ଶିକ୍ଷାର୍ଥୀମାନଙ୍କ ଘରକୁ ଯାଇ ସେମାନଙ୍କ ଆବଶ୍ୟକ ବହି ଦେବାକୁ ନିର୍ଦ୍ଦେଶ ରହିଛି। ଏହି ଆଇନକୁ କାର୍ଯ୍ୟକାରୀ କରି କୃଷ୍ଣପ୍ରସାଦ ବ୍ଲକରେ ଆରମ୍ଭ ହୋଇଛି ଶିକ୍ଷକମାନଙ୍କ ପାଠ୍ୟ ପୁସ୍ତକ ବଣ୍ଟନ। ମାଲୁଦ ସାଧନକେନ୍ଦ୍ରରେ ସିଆରସିସି ରମାକାନ୍ତ ଜେନାଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଶିକ୍ଷୟିତ୍ରୀଶିକ୍ଷକମାନେ ଶିକ୍ଷାର୍ଥୀଙ୍କ ଘରକୁ ଘର ବୁଲି ପାଠ୍ୟପୁସ୍ତକ ବଣ୍ଟିଛନ୍ତି। ବହି ବଣ୍ଟନ କରି ମାଲୁଦ ସରକାରୀ ପ୍ରାଥମିକ ବିଦ୍ୟାଳୟ ପ୍ରଧାନ ଶିକ୍ଷୟିତ୍ରୀ ପ୍ରବୀଣା ଦାସ ଏବଂ ଅର୍ଜୁନ ଦାସ ଉକ୍ତ ବହିକୁ ଘରେ ରହି ପିଲାମାନେ ପ୍ରତିଦିନ ପଢିବାକୁ କହିଥିଲେ। ବୁଝି ନ ହେଲେ ବୁଝିବା ପାଇଁ ସମସ୍ତ ଶିକ୍ଷୟିତ୍ରୀଶିକ୍ଷକଙ୍କ ଟେଲିଫୋନ ନଂ. ନେଇ ଫୋନ ମାଧ୍ୟମରେ ସେମାନଙ୍କ ସହ ଯୋଗାଯୋଗ କରିବା ପାଇଁ ଅଭିଭାବକଙ୍କୁ କହିଥିବା ଜଣାପଡିଛି। ଉକ୍ତ ବହି ବଣ୍ଟନ କୃଷ୍ଣପ୍ରସାଦ ବ୍ଲକର ସମସ୍ତ ବିଦ୍ୟାଳୟରେ ଆରମ୍ଭ ହୋଇଛି। ଏଭଳି କାର୍ଯ୍ୟକୁ ଅଭିଭାବକ, ଶିକ୍ଷାବିତ୍ମାନେ ପ୍ରଶଂସା କରିଛନ୍ତି।
