ବିଞ୍ଝାରପୁର,୨୫।୫(ଡି.ଏନ୍.ଏ.)-ବାହାର ରାଜ୍ୟରୁ ଆସିଥିବା ପ୍ରବାସୀ ଓଡ଼ିଆଙ୍କୁ ସଙ୍ଗରୋଧ ଗୃହରେ ମେନୁ ହିସାବରେ ଖାଦ୍ୟ ଦିଆଯାଉନି। ପ୍ରାୟ ସବୁଦିନ ବାଇଗଣ ତରକାରୀ ମିଳୁଛି। ଏ ନେଇ ଯେତେ କହିଲେ ବି ସୁଫଳ ମିଳୁ ନ ଥିବା ଅଭିଯୋଗ କରିଛନ୍ତି ବିଞ୍ଝାରପୁର ବ୍ଲକ କପିଳା ପଞ୍ଚାୟତସ୍ଥିତ ଏସଜି ହାଇସ୍କୁଲ ସଙ୍ଗରୋଧକ କେନ୍ଦ୍ରର ପ୍ରବାସୀମାନେ। ସେମାନଙ୍କ ଅଭିଯୋଗ ମୁତାବକ, ଉକ୍ତ ସଙ୍ଗରୋଧ କେନ୍ଦ୍ରରେ ୪୭ ଜଣ ପ୍ରବାସୀ ଓଡ଼ିଆ ରହିଛନ୍ତି। ସରକାରଙ୍କ ପକ୍ଷରୁ ଜାରି କରାଯାଇଥିବା ମେନୁ ହିସାବରେ ସେମାନଙ୍କୁ ଖାଦ୍ୟ ଦିଆଯାଉ ନାହିଁ। ଫଳରେ ସେମାନେ ନିଜ ନିଜ ଘରୁ ଖାଦ୍ୟ ମଗାଇ ଖାଉଥିବା କହିଛନ୍ତି। ଜିଲାପାଳ ଏ ଦିଗରେ ଦୃଷ୍ଟି ଦେବାକୁ ପ୍ରବାସୀ ଓଡ଼ିଆମାନେ ନିବେଦନ କରିଛନ୍ତି। ଏ ସମ୍ପର୍କରେ କେନ୍ଦ୍ରର ନୋଡାଲ ଅଧିକାରୀ ତପନ କୁମାର ନାଥଙ୍କୁ ପଚାରିବାରେ ଅଭିଯୋଗକୁ ସ୍ବୀକାର କରିବା ସହ ପ୍ରବାସୀଙ୍କୁ ବୁଝାଇ ସମସ୍ୟାର ସମାଧାନ କରାଯାଇଥିବା କହିଛନ୍ତି।
