ବାରିପଦା ଅଫିସ, ୨୧ା୩- ଗୁରୁବାର ରାତିରେ ହୋଇଥିବା ବର୍ଷାରେ ବାରିପଦା ପୌରପରିଷଦର ୨୭ନଂ. ୱାର୍ଡ଼ ତୁଳସୀଚଉରା ଅଞ୍ଚଳରେ ବସବାସ କରୁଥିବା ବିଭିିନ୍ନ ବ୍ୟକ୍ତିଙ୍କ ଘରେ ଡ୍ରେନ ପାଣି ପଶି ଯାଇଥିଲା। ଏହାର ପ୍ରତିବାଦରେ ଶୁକ୍ରବାର ସକାଳେ ୭ଟାରେ ଅଞ୍ଚଳବାସୀ ତୁଳସୀଚଉରା ଛକଠାରେ ରାସ୍ତାରୋକେ କରିଥିଲେ। ଅଭିଯୋଗ ଅନୁଯାୟୀ ଅଞ୍ଚଳ ଦେଇ ଯାଇଥିବା ଡ୍ରେନ୍କୁ ପୌରପିଷଦ ସଫା କରୁ ନ ଥିବାରୁ ଏଭଳି ସୁବିଧା ହେଉଛି। ସେହିଭଳି ନୂତନ ଡ୍ରେନ୍ ନିର୍ମାଣ ପାଇଁ ଦାବି କରାଯାଉ ଥିଲେ ମଧ୍ୟ ଡ୍ରେନ୍ କାମ ହେଉ ନାହିଁ। ଗୁରୁବାର ରାତିରେ ପ୍ରବଳ ବର୍ଷା ହେବାରୁ ଲୋକମାନଙ୍କ ଘରେ ପାଣି ପଶି ଯାଇଥିଲା। ଏପରିକି କିଛିଲୋକ ଘରେ ପାଣି ପଶି ଯାଇଥିବାରୁ ସେମାନେ ରୋଷେଇ କରି ପାରି ନ ଥିବା ପ୍ରକାଶ କହିଛନ୍ତି। ଶୁକ୍ରବାର ତୁଳସୀଚଉରାଠାରୁ ତକତପୁରକୁ ଯାଇଥିବା ରାସ୍ତାକୁ ଅବରୋଧ କରାଯିବା ଫଳରେ ଉକ୍ତ ରାସ୍ତାରେ ଯାନବହାନ ଚଳାଚଳ ଠପ୍ ହୋଇ ପଡ଼ିଥିଲା। ଖବର ପାଇ ଟାଉନ ପୋଲିସ ଓ ଗ୍ରାମ୍ୟ ଉନ୍ନୟନ ବିଭାଗର ଅଧିକାରୀ ଆସି ଲୋକଙ୍କୁ ବୁଝାସୁଝା କରିବା ସହିତ ଏ ଦିଗରେ ତୁରନ୍ତ ପଦକ୍ଷେପ ନେବେ ବୋଲି ପ୍ରତିଶ୍ରୁତି ଦେବା ପରେ ସକାଳ ୯ଟ ୩୦ରେ ରାସ୍ତାରୋକୋ ପ୍ରତ୍ୟାହୃତ ହୋଇଥିଲା। ଆଗାମୀ ଦିନରେ ଏହାର ସମାଧାନ ନ ହେଲେ ଅଞ୍ଚଳବାସୀ ପୁନର୍ବାର ରାସ୍ତାକୁ ଓହ୍ଲାଇବେ ବୋଲି ପ୍ରକାଶ କରିଛନ୍ତି। ଗ୍ରାମ୍ୟ ଉନ୍ନୟନ ବିଭାଗର ଏସଡ଼ିଓ ଶାନ୍ତନୁ ନାୟକ ନାଳକୁ ସଫା କରି ଡ୍ରେନ୍ କାମ ଆରମ୍ଭ ହେବ ବୋଲି କହିଛନ୍ତି।
