ସିଡ୍ନୀ, ୧୩ା୪ (ଏଏଫ୍ପି)-ଅଷ୍ଟ୍ରେଲିଆ ଟେନିସ ଷ୍ଟାର ନିକ୍ କିର୍ଗିଓସ ଜଣେ ସ୍ପଷ୍ଟବାଦୀ ଭାବେ ଜଣାଶୁଣା। ଟେନିସ୍ କୋର୍ଟରେ ମଧ୍ୟ ଅନେକ ଥର ଝାମେଲା କରି ବିବାଦୀୟ ହୋଇଛନ୍ତି। କିନ୍ତୁ କରୋନା ଭାଇରସ୍ ପାଇଁ ଦେଶରେ ଶଟ୍ ଡାଉନ୍ ଚାଲିଥିବାରୁ ଅନାହାରରେ ଥିବା ଲାକମାନଙ୍କୁ ଖାଦ୍ୟ ଯୋଗାଇଦେବା ଲାଗି ସେ ଅଣ୍ଟା ଭିଡ଼ିଛନ୍ତି। ମେସେଜ ପାଇବା ମାତ୍ରେ ସେ ଏକ ବାକ୍ସରେ ଅତ୍ୟାବଶ୍ୟକ ସାମଗ୍ରୀ ନେଇ ଘରେ ଦେଇ ଆସୁଛନ୍ତି। ଶଟ୍ଡାଉନ୍ ଯୋଗୁ ସମଗ୍ର ଅଷ୍ଟ୍ରେଲିଆରେ ଇଣ୍ଡଷ୍ଟ୍ରିଗୁଡ଼ିକ ବନ୍ଦ ରହିଛି। ବହୁ ଲୋକ କାର୍ଯ୍ୟ ହରାଇବାକୁ ବାଧ୍ୟ ହୋଇଛନ୍ତି। ସେମାନେ ଦୁଃଖ ଓ ବିଷାଦରେ କାଳାତିପାତ କରୁଛନ୍ତି। ବିଶ୍ୱର ୪୦ନମ୍ବର ମାନ୍ୟତାପ୍ରାପ୍ତ କିର୍ଗିଓସ ଇଷ୍ଟାଗ୍ରାମ୍ରେ ଏକ ପୋଷ୍ଟ କରିଛନ୍ତି। ଦୟାକରି ଭୋକିଲାରେ କେହି ଶୁଅ ନାହିଁ। କୌଣସି ଅସୁବିଧା ଥିଲେ କିଛି ନ ଭାବି ଏକ ମେସେଜ ଜରିଆରେ ମୋତେ ଜଣାଇବା ଲାଗି କୁଣ୍ଠିତ ହୁଅନ୍ତୁ ନାହିଁ ବୋଲି ଏଥିରେ ସେ ଉଲ୍ଲେଖ କରିଛନ୍ତି। ନୁଡୁଲ୍ସ, ପାଉଁରୁଟି କିମ୍ବା କ୍ଷୀର ଆବଶ୍ୟକ କରୁଥିଲେ ମୁଁ ତାହା ଘରେ ତାହାକୁ ପହଁଚାଇଦେବି ବୋଲି ସେ କହିଛନ୍ତି। ତାଙ୍କର ଏହି ପୋଷ୍ଟକୁ ପାଖାପାଖି ୧୦୦,୦୦୦ ଲାଇକ୍ ଆସଛି। ନିକ୍ଙ୍କ ମା ନର୍ଲେଲା କିର୍ଗିଓସ ଇନଷ୍ଟିଗ୍ରାମ୍ରେ ଏକ ଫଟୋ ପୋଷ୍ଟ କରିଛନ୍ତି। ଫଟୋଟିରେ ଏକ ଟେବୁଲ ଉପରେ ପାଉଁରୁଟି, ଫଳ ଏବଂ ଅନ୍ୟାନ୍ୟ ଖାଦ୍ୟ ସାମଗ୍ରୀ ଗଦା ହୋଇଥିବାରୁ ଦୃଶ୍ୟ ରହିଛି। ନର୍ଲେଲା ଫଟୋଟିର କ୍ୟାପଶନ ରଖିଛନ୍ତି ’ ଡାଇନିଂ ରୁମ୍ ଅର୍ ଫୁଡ୍ ଡିଷ୍ଟ୍ରିବ୍ୟୁଶନ ସେଣ୍ଟର’।
