ଗୋପ,୧୫।୭(ଡ଼ି.ଏନ୍.ଏ.) : ଅଗ୍ନିକୁ ସାକ୍ଷୀ ରଖି ସାରାଜୀବନ ସଂସାର କରିବାକୁ ଆସିଥିବା ନବବଧୂ ରବିବାର ସନ୍ଧ୍ୟାରେ ଚତୁର୍ଥୀ ରାତିରେ ଶାଶୁଘର ଛାଡି ବାପା ଘରକୁ ଚାଲି ଯାଇଛନ୍ତି। ଏହାକୁ ନେଇ ପୁରୀ ଜିଲା ଗୋପ ଥାନା ଅଞ୍ଚଳରେ ଚର୍ଚ୍ଚା ଜୋର ଧରିଛି। ଗତ ୧୧ ତାରିଖରେ ଗୋପ ଥାନା ଅଧୀନ ଗଡକରମଳା ଗାଁର ଜଣେ ଯୁବକ ଅସ୍ତରଙ୍ଗ ଥାନା ଅଞ୍ଚଳର ଜଣେ କନ୍ୟାକୁ ବୈଦିକ ରୀତିରେ ବିବାହ କରିଥିଲେ। ରବିବାର ଚତୁର୍ଥୀ କାର୍ଯ୍ୟ ଲାଗି ହୋମ ସହ ଭୋଜିଭାତର ମଧ୍ୟ ଆୟୋଜନ କରାଯାଇଥିଲା। କିନ୍ତୁ ନବବଧୂ ତାଙ୍କ ସ୍ବାମୀ ଜଣେ ମାନସିକ ବିକାରଗସ୍ତ ଥିବା ବାପ ଘରକୁ ଜଣାଇଥିଲେ। ବାପଘର ଲୋକେ ଏ ସମ୍ପର୍କରେ ଗୋପ ଥାନାରେ ଅଭିଯୋଗ କରିଥିଲେ। ଅଭିଯୋଗକୁ ଭିତ୍ତିକରି ଥାନା ଅଧିକାରୀ ଦିଲୀପ କୁମାର ସ୍ବାଇଁ ନବବଧୂଙ୍କୁ ଉଦ୍ଧାର କରି ଥାନାକୁ ଆଣିଥିଲେ। ପରେ ୨ ପକ୍ଷ ଥାନାରେ ପହଞ୍ଚତ୍ ଆପୋସ ସମାଧାନ କରିବା ଲାଗି ଚେଷ୍ଟା କରିଥିଲେ। ହେଲେ ନବବଧୂ ଶାଶୁଘରେ ରହିବାକୁ ରାଜି ହୋଇ ନ ଥିଲେ। ବୀରତୁଙ୍ଗ ସରପଞ୍ଚ ଶଶାଙ୍କ ଶେଖର ମହାପାତ୍ରଙ୍କୁ ପଚାରିବାରେ ସେ କହିଲେ, ଥାନାଧିକାରୀ ଡାକିବାରୁ ମୁଁ ଥାନାକୁ ଯାଇଥିଲି। ଯୁବକ ଜଣକ ଭଲ ପିଲା। ସେ ମାନସିକ ବିକାରଗ୍ରସ୍ତ ନୁହେଁ ବୋଲି ମୁଁ ଥାନାରେ କହିଥିଲି। ଯୁବକଙ୍କ ବାପା କହିଛନ୍ତି ଯେ, ମୋ ପୁଅ ଉଚ୍ଚ ଶିକ୍ଷିତ। ସେ ଜଣେ ଭଦ୍ର ଓ ନମ୍ର ସ୍ବଭାବର। ଏ ସଂକ୍ରାନ୍ତରେ କନ୍ୟାପିତା କହିଛନ୍ତି ଯେ, ଝିଅ ଯେହେତୁ ଅଭିଯୋଗ କଲା ତା’ର ଭବିଷ୍ୟତକୁ ଲକ୍ଷ୍ୟ କରି ତାକୁ ଘରକୁ ନେଉଛି। ଡାକ୍ତରୀ ପରୀକ୍ଷା ପରେ ଯଦି ଜ୍ୱାଇଁ ଭଲ ଥିବା ଜଣାପଡ଼େ ତାହାହେଲେ ପରିବାର ଲୋକଙ୍କ ସହ ଆଲୋଚନା କରି ପରବର୍ତ୍ତୀ ପଦକ୍ଷେପ ଗ୍ରହଣ କରାଯିବ। ଥାନା ଅଧିକାରୀ ଦିଲୀପ କୁମାର ସ୍ବାଇଁ ଥାନାରେ ଆପୋସ ସମାଧାନ ଲାଗି ଉଦ୍ୟମ କରିଥିଲୁ। ମାତ୍ର ଏଥିରେ ନବବଧୂ ରାଜି ନ ହୋଇ ବାପ ଘରକୁ ପଲାଇ ଯାଇଛନ୍ତି।
