ଭୋପାଳ,୧୧।୯: ଚନ୍ଦ୍ରୟାନ-୨ର ବିଫଳତା ମଧ୍ୟପ୍ରଦେଶରେ ଜଣେ ଯୁବକ ହଙ୍ଗାମା କରିଛନ୍ତି। ଯୁବକଙ୍କ ଭିଡ଼ିଓ ଏବେ ସୋସିଆଲ୍ ମିଡ଼ିଆରେ ଭାଇରାଲ ହେବାରେ ଲାଗିଛି। ସାଗର ଅଞ୍ଚଳରେ ଭୋର୍ ସମୟରେ ଜଣେ ଯୁବକ ଯାତ୍ରୀବାହୀ ଟ୍ରେନ୍ ଇଞ୍ଜିନ୍ ଉପରେ ବସିପଡ଼ିଥିଲେ। ତାଙ୍କ ମୁଣ୍ଡ ଉପରେ ହାଇଟେନ୍ସନ୍ ବିଦ୍ୟୁତ୍ ତାର ଥିଲେ ମଧ୍ୟ ସେଥିପ୍ରତି ତାଙ୍କର ନିଘା ନ ଥିଲା। ଯୁବକ ଟ୍ରେନ୍ ଇଞ୍ଜିନ୍ ଉପରେ ବସିଥିବା ଦେଖି ରେଲଓ୍ବେ କର୍ମଚାରୀ ବିଦ୍ୟୁତ୍ ସଂଯୋଗ କାଟିବା ସହିତ ସେ ସେଠାରେ କାହିଁକି ବସିଛନ୍ତି ବୋଲି ପ୍ରଶ୍ନ କରିଥିଲେ। ତେବେ ଉତ୍ତରରେ ଯୁବକ ପ୍ରଶ୍ନ କରିଥିଲେ ଯେ, ଚନ୍ଦ୍ରୟାନ-୨ କାହିଁକି ବିଫଳ ହେଲା। ଏହା ଏକ ରୋଚକ ସ୍ଥିତି ସୃଷ୍ଟି କରିଥିଲେ ମଧ୍ୟ ଟ୍ରେନ୍ ଅଟକି ରହିବାରୁ ଯାତ୍ରୀମାନଙ୍କ ମଧ୍ୟରେ ଉଦ୍ବେଗ ପ୍ରକାଶ ପାଇଥିଲା। ଯୁବକ ଇଞ୍ଜିନ୍ ଉପରେ ହଟିବାକୁ ମନା କରିବା ସହିତ ଧମକ ଦେବା ଆରମ୍ଭ କରିଥିଲେ। ବହୁକଷ୍ଟରେ ତାଙ୍କୁ ତଳକୁ ଅଣାଯାଇଥିଲା। ଯାତ୍ରୀବାହୀ ଟ୍ରେନ୍ ଅଧଘଣ୍ଟା ଅଟକି ରହିବା ପରେ ଗନ୍ତବ୍ୟ ପଥରେ ଯାତ୍ରା କରିଥିଲା। ମଦ୍ୟପାନ କରିଥିବା ଏହି ଯୁବକଙ୍କର ମାନସିକ ଅବସ୍ଥା ଠିକ ନ ଥିବା କୁହାଯାଉଛି। ତାଙ୍କୁ ଅଟକ ରଖି ପଚରାଉଚରା କରାଯାଉଛି।
