ନୂଆଦିଲ୍ଲୀ,୨୩।୧: ଚଳିତ ୨୦୧୯-୨୦ ଆର୍ଥିକ ବର୍ଷର ନଭେମ୍ବର ସୁଦ୍ଧା ୬୨ ଲକ୍ଷ ୩୮ ହଜାରଙ୍କୁ ନୂତନ ନିଯୁକ୍ତି ମିଳିଛି। ୨୦୧୮-୧୯ରେ ଏହା ୬୧ ଲକ୍ଷ ୧୨ ହଜାର ଥିଲା ବୋଲି କର୍ମଚାରୀ ଭବିଷ୍ୟନିଧି ସଂଗଠନ(ଇପିଏଫ୍ଓ) ପକ୍ଷରୁ ପ୍ରକାଶିତ ଏକ ରିପୋର୍ଟରେ ପ୍ରକାଶ ପାଇଛି। ଚଳିତ ବର୍ଷ ନୂତନ ନିଯୁକ୍ତି ସଂଖ୍ୟା ପୁଣି ବଢ଼ିବ ବୋଲି ରିପୋର୍ଟରେ ସୂଚନା ଦିଆଯାଇଛି। ଚଳିତ ଆର୍ଥିକ ବର୍ଷର କେବଳ ନଭେମ୍ବର ମାସରେ ହିଁ ୧୧ ଲକ୍ଷ ୬୨ ହଜାର ନୂତନ ନିଯୁକ୍ତି ଦିଆଯାଇଛି। ୨୨ରୁ ୨୫ ବର୍ଷ ବୟସ୍କଙ୍କୁ ସର୍ବାଧିକ ୩ ଲକ୍ଷ ୯ ହଜାରଙ୍କୁ ନୂତନ ନିଯୁକ୍ତ ମିଳିଛି। ତେବେ ସେଣ୍ଟର ଫର୍ ମନିଟରିଂ ଇଣ୍ଡିଆନ୍ ଇକୋନୋମି ପକ୍ଷରୁ ପ୍ରକାଶିତ ଏକ ରିପୋର୍ଟରେ କୁହାଯାଇଛି ଯେ, ୨୦୧୯ ସେପ୍ଟେମ୍ବରରୁ ଡିସେମ୍ବର ୪ ମାସ ମଧ୍ୟରେ ଦେଶରେ ବେରୋଜଗାରୀ ହାର ୭.୫ ପ୍ରତିଶତରେ ପହଞ୍ଚିଥିଲା। ସେହିପରି ଶିକ୍ଷିତଙ୍କ ମଧ୍ୟରେ ବେକାର ହାର ୬୦ ପ୍ରତିଶତ ହୋଇଥିବା ଏହି ରିପୋର୍ଟରେ ଦର୍ଶାଯାଇଛି।
