ମୁମ୍ବାଇ: ଦୃଢ଼ ଇଚ୍ଛାଶକ୍ତି ଆଗରେ ହାରମାନେ ଜୀବନର ପ୍ରତିଟି ବାଧାବିଘ୍ନ। ଏଭଳି କିଛି ଦେଖିବାକୁ ମିଳିଛି ସୋନି ଚ୍ୟାନେଲରେ ପ୍ରସାରିତ ‘କୌନ୍ ବନେଗା କରୋଡପତି’ ମଞ୍ଚରେ। ଉତ୍ତରପ୍ରଦେଶର ଉନ୍ନାଓ ଜିଲାର ବିଘାପୁରରେ ଜନ୍ମିତ ଦିବ୍ୟାଙ୍ଗ ନୂପୁର ସିଂ କେବିସିରେ ଭାଗ ନେଇ ୧୨.୫ଲକ୍ଷ ଜିତିବାରେ ସକ୍ଷମ ହୋଇଛନ୍ତି। ଏପରିକି ତାଙ୍କ ଜୀବନକାହାଣୀ କୋଟି କୋଟି ହୃଦୟ ଜିଣିଛିି।
ନୂପୁର, ରାମ କୁମାର ସିଂ ଓ କଳ୍ପନା ସିଂହଙ୍କ ଝିଅ। ତାଙ୍କ ବାପା ଜଣେ କୃଷକ। ତେବେ ନୂପୁର ଜନ୍ମ ହେବା ସମୟରେ ଡାକ୍ତର ତାଙ୍କୁ ମୃତ ଘୋଷଣା କରି ଅଳିଆ ଗଦାରେ ଫିଙ୍ଗି ଦେଇଥିଲେ। ଜଣେ ସମ୍ପର୍କୀୟ ତାଙ୍କ ଦେହରେ ଜୀବନ ଥିବା ଅନୁଭବ କରି ତାଙ୍କୁ ଘରକୁ ନେଇଆସିଥିଲେ। ମାତ୍ର ଜନ୍ମର କିଛି ସମୟ ପୂର୍ବରୁ ଡାକ୍ତରଙ୍କ ଅସାବଧାନତା କାରଣରୁ ସେ ସବୁଦିନ ପାଇଁ ଦିବ୍ୟାଙ୍ଗ ପାଲଟି ଯାଇଥିଲେ।
ପିଲାଟି ବେଳୁ ଜଣେ ମେଧାବୀ ଛାତ୍ରୀଭାବେ ସେ ସ୍କୁଲ, କଲେଜରେ ନାମ କମାଇଥିଲେ। ଏପରିକି ପ୍ରଥମ ଥରରେ ବିଏଡ୍ ପରୀକ୍ଷାରେ କୃତକାର୍ଯ୍ୟ ହୋଇଥିଲେ। ଏବେ ସେ ଏକ ପ୍ଲେ ଗ୍ରୁପ୍ ସହ ଜଡିତ ଥିବା ବେଳେ ଦଶମ ଶ୍ରେଣୀର ପିଲାଙ୍କୁ ଶିକ୍ଷାଦାନ କରୁଛନ୍ତି।
କେବିସିରେ ଭାଗ ନେବା ଓ ଜିତିବା ନେଇ ନୂପୁରଙ୍କ ମା’ କଳ୍ପନା କୁହନ୍ତି,‘ ସେ ସବୁବେଳେ କେବିସି ଦେଖିବାକୁ ଭଲ ପାଉଥିଲା। ସବୁଥର ପ୍ରତିଯୋଗୀଙ୍କୁ ପ୍ରଶ୍ନ ପଚରାଯାଉଥିଲା। ହେଲେ ସେ ଘରେ ବସି ପ୍ରଥମେ ତାର ଉତ୍ତର ସହଜରେ ଦେଇ ଦେଉଥିଲା। ଝିଅର ଏଭଳି ଆଗ୍ରହ ଦେଖି ଏ ବର୍ଷ ତାକୁ ଏହି ଶୋ’ରେ ଭାଗ ନେବାକୁ କହିଥିଲୁ। ଆମ କଥା ଅନୁସାରେ ସେ ସମ୍ମତି ଜଣାଇଥିଲା ଏବଂ ଚେଷ୍ଟା କରିଥିଲା। ଶେଷରେ ସେ ଏଥିପାଇଁ ଚୟନ ହୋଇଥିଲା। ଏବେ ସେ ୧୨.୫ଲକ୍ଷ ଜିତିବାରେ ସଫଳ ହୋଇଛି। ନିଜ ଜୀବନକୁ ନେଇ ନୂପୁର କେବେ ହେଲେ ଅନ୍ୟ କାହାକୁ ଦୋଷ ଦିଏ ନାହିଁ। ଯାହା ହୋଇଛି ତାହା ହେବାର ଥିଲା ବୋଲି ସେ ଦୃଢ଼ତାର ସହ କହିଥାଏ ବୋଲି ବ୍ୟକ୍ତ କରନ୍ତି କଳ୍ପନା।’
