ବ୍ରହ୍ମପୁର ଅଫିସ,୧୪ା୨- ସାଇଲ୍ୟାଣ୍ଡ କେଶୁରିଆ ଗ୍ରୁପ ଚିଟଫଣ୍ଡ ସଂସ୍ଥା ପରିଚାଳନା ନିର୍ଦ୍ଦେଶକ (ଏମ୍ଡି) ଗୋପାଳ ଚନ୍ଦ୍ର ରାଉତ(୪୪)ଙ୍କୁ ଟଙ୍କା ଠକେଇ ଅଭିଯୋଗରେ ଗୋଷାଣୀନୂଆଗଁା ପୋଲିସ ୨ ବର୍ଷ ପରେ ଗିରଫ କରିଛି। ମାମଲା ନଂ. ୮୬/୧୭ରେ ଉକ୍ତ ଚିଟଫଣ୍ଡ ସଂସ୍ଥା ଏମ୍ଡ଼ି ଗୋପାଳଙ୍କୁ ଗୁରୁବାର ବ୍ରହ୍ମପୁର ଚିଟ୍ଫଣ୍ଡ କୋର୍ଟଚାଲାଣ କରାଯାଇଛି ବୋଲି ଥାନାଧିକାରୀ ସୁମିତ କୁମାର ସୋରେନ ସୂଚନା ଦେଇଛନ୍ତି। ଚିଟଫଣ୍ଡ ବିଚାରପତି ଦେବାଶିଷ ପଣ୍ଡା ଅଭିଯୁକ୍ତଙ୍କ ଜାମିନ ନାମଞ୍ଜୁର କରି ବିଚାର ବିଭାଗୀୟ ହାଜତକୁ ପଠାଇ ଦେଇଥିବା କୋର୍ଟ ସୂତ୍ରରୁ ପ୍ରକାଶ। ଅନ୍ୟପଟେ ଏହି ମାମଲାରେ କମ୍ପାନୀର ଅନ୍ୟ ସଦସ୍ୟଙ୍କ ନାମରେ ଥିବା ବେଳେ ସେମାନେ ଏବେ ଫେରାର ଅଛନ୍ତିି। ଘଟଣାରୁ ପ୍ରକାଶ, ଉକ୍ତ ଅର୍ଥଲଗାଣକରୀ ସଂସ୍ଥା ସୁରଟର ଏମ୍ବ୍ରିଲରେ ମୁଖ୍ୟ କାର୍ଯ୍ୟାଳୟ ଖୋଲିଥିଲା। ଗୋପାଳଙ୍କ ଘର ଗାଙ୍ଗପୁର ଥାନା ଅନ୍ତର୍ଗତ କୁଡ଼ଙ୍ଗୀ ହୋଇଥିବାରୁ ସେ ଗଞ୍ଜାମ ସମେତ ରାଜ୍ୟର ବିଭିନ୍ନ ସ୍ଥାନରେ ମଧ୍ୟ ୨୦୧୦ରେ ଏହି ଅର୍ଥଲଗାଣକାରୀ ସଂସ୍ଥା ଖୋଲିଥିଲେ। ନିରୀହ ଜମାକାରୀଙ୍କୁ ବିଭିନ୍ନ ଏଜେଣ୍ଟଙ୍କ ଦ୍ୱାରା ଲୋଭନୀୟ ସ୍କିମ ଜରିଆରେ ପ୍ରଲୋଭନ ଦେଖାଇଥିଲେ। କାହାକୁ ଜମି ଦେବା ନଁାରେ ତ ଆଉ କାହାକୁ ଜମା ଟଙ୍କାର କମ ଦିନ ଭିତରେ ଦୁଇ ଗୁଣା ଫେରସ୍ତ ଦେବାକୁ ପ୍ରତିଶ୍ରୁତି ଦେଇ ୩ ଶହରୁ ଊର୍ଦ୍ଧ୍ୱ ଜମାକାରୀଙ୍କଠାରୁ ୧ କୋଟି ୫୦ ଲକ୍ଷ ଟଙ୍କା ଠକେଇ କରିଥିଲେ । ଏନେଇ ତାଙ୍କ ନାମରେ ବିଭିନ୍ନ ଥାନାରେ ଅଭିଯୋଗ ହୋଇଥିଲା। ସେହିପରି ୨୦୧୭ ଅକ୍ଟୋବର ୨୨ରେ ଗୋଷାଣୀନୂଆଗଁା ଥାନାରେ ଉକ୍ତ ଚିଟ୍ଫଣ୍ଡ ସଂସ୍ଥାରୁ ଠକେଇର ଶିକାର ହୋଇଥିବା ରଜନୀ କାନ୍ତ ପାଢ଼ୀ ଅଭିଯୋଗ କରିଥିଲେ। ପୋଲିସ ନଂ.୮୬/୧୭ ରେ ଏକ ମାମଲା ରୁଜୁ କରି ତଦନ୍ତ ଜାରି ରଖିଥିଲା।
