ପରଜଙ୍ଗ, ୨୪।୧(ଡି.ଏନ.ଏ.)
ପୂର୍ବ ଭାରତ ବିଜ୍ଞାନ ମେଳାରେ ଚମକିଛନ୍ତି ଢେଙ୍କାନାଳ ଜିଲା ପରଜଙ୍ଗ ବ୍ଲକ କୁଲେଇସ୍ଥିତ ତାଳେଶ୍ୱର ବିଦ୍ୟାପୀଠର ଦଶମ ଶ୍ରେଣୀ ଛାତ୍ରୀ ଚୁଲ୍ବୁଲି ଜେନା। ତାଙ୍କ ଦ୍ୱାରା ପ୍ରଦର୍ଶିତ ବିଜ୍ଞାନ ମଡେଲ ‘ଫିଙ୍ଗର ପ୍ରିଣ୍ଟ ବେସଡ ରାଶନ ଡିଷ୍ଟ୍ରିବ୍ୟୁଶନ ସେଣ୍ଟର’ ବିଚାରକଙ୍କ ମନକୁ ଛୁଇଁଥିବାବେଳେ ନୂଆଦିଲ୍ଲୀରେ ହେବାକୁ ଥିବା ଜବାହରଲାଲ ନେହେରୁ ବିଜ୍ଞାନ, ଗଣିତ ଏବଂ ପରିବେଶ ମେଳା-୨୦୨୦କୁ ମନୋନୀତ ହୋଇଛି।
ବିଜ୍ଞାନ ଶିକ୍ଷକ ଗିରିଶ ଚନ୍ଦ୍ର ନାୟକଙ୍କ ତତ୍ତ୍ୱାବଧାନରେ ଚୁଲ୍ବୁଲି ଏହି ମଡେଲ ପ୍ରସ୍ତୁତ କରିଛନ୍ତି। ଏଥିପୂର୍ବରୁ ଉକ୍ତ ପ୍ରକଳ୍ପ ବିଦ୍ୟାଳୟ, ବ୍ଲକସ୍ତରରେ ଶ୍ରେଷ୍ଠ ସ୍ଥାନ ହାସଲ କରିଥିଲା। କଲିକତାରେ ଅନୁଷ୍ଠିତ ପୂର୍ବ ଭାରତ ବିଜ୍ଞାନ ମେଳାରେ ଉକ୍ତ ପ୍ରକଳ୍ପ ‘ଓଡ଼ିଶାର ବେଷ୍ଟ ମଡେଲ’ ଟ୍ରଫି ପାଇଛି। ପଶ୍ଚିମବଙ୍ଗ ରାଜ୍ୟପାଳଙ୍କ ସମେତ ବହୁ ମାନ୍ୟଗଣ୍ୟ ବ୍ୟକ୍ତି ଉପସ୍ଥିତ ରହି ଚୁଲ୍ବୁଲିଙ୍କ ମଡେଲକୁ ଭୂୟସୀ ପ୍ରଶଂସା କରଥିଲେ। ଭାରତ ସରକାରଙ୍କ ଖାଦ୍ୟ ସୁରକ୍ଷା ଯୋଜନାରେ ଅନ୍ତର୍ଭୁକ୍ତ ହୋଇଥିବା ଗରିବ ହିତାଧିକାରୀଙ୍କ ରାଶନକୁ ଏହି ମଡେଲ ସୁରକ୍ଷିତ ରଖିବ। ସେମାନେ ଠକାମିରେ ପଡ଼ିବେ ନାହିଁ। ସରକାରଙ୍କ ନୂତନ ଯୋଜନା ‘ଗୋଟିଏ ଦେଶ, ଗୋଟିଏ ରାଶନ’ ପାଇଁ ଏହା ବେଶ୍ ସହାୟକ ହେବ ବୋଲି ଚୁଲ୍ବୁଲି କହିଛନ୍ତି। ଜାତୀୟସ୍ତରୀୟ ପ୍ରତିଯୋଗିତାରେ ମଧ୍ୟ ଚୁଲ୍ବୁଲି ସୁନାମ ଆଣନ୍ତୁ ବୋଲି ପ୍ରଧାନ ଶିକ୍ଷକ ସୁମନ୍ତ ବେହେରା, ଶିକ୍ଷକ ସନ୍ତୋଷ ସ୍ବାଇଁ, ରଞ୍ଜନ ବେହେରା, ଦୁଷ୍ମନ୍ତ ନାୟକ, ସୌଭାଗ୍ୟ ସାହୁ ଆଶାବ୍ୟକ୍ତ କରିଛନ୍ତି।
