ନୂଆଦିଲ୍ଲୀ,୧୬।୧୨: ନାଗରିକତା ସଂଶୋଧନ ଆଇନ(ସିଏଏ) ବିରୋଧରେ ରବିବାର ହୋଇଥିବା ହିଂସାତ୍ମକ ପ୍ରଦର୍ଶନ ପରେ ସୋମବାର ଦିଲ୍ଲୀ ପୋଲିସ ଏକ ଖବରଦାତା ସମ୍ମିଳନୀ କରିଛି। ଏଥିରେ ପୋଲିସ ଜାମିଆ ଘଟଣା ସମ୍ପର୍କରେ ସବିଶେଷ ତଥ୍ୟ ଦେଇଛି। ହିଂସା ସମୟରେ ପୋଲିସ ପକ୍ଷରୁ କୌଣସି ଫାୟାରିଂ କରାଯାଇନାହିଁ ବୋଲି ଦିଲ୍ଲୀ ପୋଲିସ ଡିସିପି ତଥା ମୁଖପାତ୍ର ଏମ୍. ଏସ୍ ରନ୍ଧଓ୍ବା କହିଛନ୍ତି। ସେ କହିଛନ୍ତି, ପ୍ରଥମେ ପ୍ରଦର୍ଶନକାରୀମାନେ ପୋଲିସଙ୍କ ସହ ମୁହାଁମୁହିଁ ହୋଇଥିଲେ ଓ ଠେଲାପେଲା କରିଥିଲେ। ପରିସ୍ଥିତିକୁ ଆୟତ୍ତ କରିବା ପାଇଁ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଇଥିଲା। ଆହୁରି ମଧ୍ୟ କହିଛନ୍ତି, ଆନ୍ଦୋଳନକାରୀଙ୍କୁ କାବୁ କରିବାକୁ ଯାଇ ପୋଲିସ ସେମାନଙ୍କ ପଛରେ ଦୌଡୁଥିବା ସମୟରେ ବୋଧ ହୁଏ ଜାମିଆ କ୍ୟାମ୍ପସ ଭିତରକୁ ପ୍ରବେଶ କରିଥାଇପାରେ। ତେବେ ଦଙ୍ଗା କରୁଥିବା ଛାତ୍ରମାନେ ପୋଲିସଙ୍କ ଉପରେ ପଥରମାଡ କରିବା ସହ ପେଟ୍ରୋଲ ବମ୍ ଫୋପାଡିଥିଲେ। ହେଲେ ଏହାକୁ ଅତିରଞ୍ଜିତ କରାଯାଇ ସୋସିଆଲ ମିଡିଆରେ ମିଥ୍ୟା ପ୍ରଚାର କରାଯାଇଛି। ଅପରପକ୍ଷରେ ଜାମିଆ ମାମଲାକୁ ନେଇ ସୋସିଆଲ ମିଡିଆରେ ଗୁଜବ ପ୍ରଚାର କରୁଥିବା ବ୍ୟକ୍ତିଙ୍କ ବିରୋଧରେ ଯାଞ୍ଚ କରାଯାଉଛି। ଏଥିରେ ଯେଉଁମାନଙ୍କର ସମ୍ପୃକ୍ତି ରହିଛି ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ଡିସିପି କହିଛନ୍ତି।
