ଢେଙ୍କାନାଳ ଅଫିସ,୨୬।୪: ଜେରକ୍ସ ଦୋକାନରେ କମ୍ପ୍ୟୁଟର ସହାୟତାରେ ପ୍ରସ୍ତୁତ କରାଯାଉଥିଲା ନକଲି ସାର୍ଟିଫିକେଟ। ଟଙ୍କା ଦେଲେ ମିଳିଯାଉଥିଲା ପ୍ରମାଣପତ୍ର। ନା ପରୀକ୍ଷା ଦେବାକୁ ପଡୁଥିଲା ନା କମ୍ ମାର୍କ ଆସିବାର ଭୟ ରହୁଥିଲା। ଆଶାୟୀଙ୍କ ମନ ମୁତାବକ ସାର୍ଟିଫିକେଟରେ ମାର୍କ ଚଢ଼ାଇ ଦିଆଯାଉଥିଲା। ଢେଙ୍କାନାଳରୁ ଜାଲ ସାର୍ଟିଫିକେଟ କେଳେଙ୍କାରୀ ମାମଲାର ଲିଙ୍କ୍ ମିଳିବା ପରେ ଏଭଳି ଅନେକ ଚାଞ୍ଚଲ୍ୟକର ତଥ୍ୟ ସାମ୍ନାକୁ ଆସିଛି। ଏହାପରେ ଏହି କାରବାରରେ ସମ୍ପୃକ୍ତ ଅଭିଯୁକ୍ତଙ୍କ ନିକଟରେ ପହଞ୍ଚତ୍ବା ପାଇଁ ପୋଲିସ ପକ୍ଷରୁ ତନାଘନା ଆରମ୍ଭ ହୋଇଛି।
ଢେଙ୍କାନାଳ ଡାକମଣ୍ଡଳ ଗ୍ରାମାଞ୍ଚଳ ଶାଖାରେ ପୋଷ୍ଟମାଷ୍ଟର ନିଯୁକ୍ତି ଲାଗି କେତେଜଣ ଆଶାୟୀ ଜାଲ୍ ସାର୍ଟିଫିକେଟ୍ ପ୍ରଦାନ କରିଥିବା ସନ୍ଦେହ କରାଯାଉଛି। ଇତିମଧ୍ୟରେ ସୋମବାର ବ୍ରହ୍ମପୁର ପୋଲିସ ଏ ସଂକ୍ରାନ୍ତରେ ଏକ ଆନ୍ତଃରାଜ୍ୟ ରାକେଟର ରହସ୍ୟ ଉନ୍ମୋଚନ କରିଛି। ଏହି ଘଟଣାରେ ଗିରଫ ୪ ଜଣଙ୍କ ମଧ୍ୟରେ ଢେଙ୍କାନାଳ ଟାଉନ ଥାନା ଅଞ୍ଚଳର ପ୍ରଶାନ୍ତ କୁମାର ସାହୁ (୩୯) ରହିଛନ୍ତି। ତେଣୁ ଢେଙ୍କାନାଳରେ ଜାଲ ସାର୍ଟିଫିକେଟ କାରବାର ସକ୍ରିୟ ଥିବା ସ୍ପଷ୍ଟ ହୋଇଛି। ସୂଚନାଯୋଗ୍ୟ, ଢେଙ୍କାନାଳ ସହରରେ ପ୍ରଶାନ୍ତଙ୍କ ଏକ ଜେରକ୍ସ ଦୋକାନ ରହିଛି। ଉକ୍ତ ଦୋକାନରେ କମ୍ପ୍ୟୁଟର ସହାୟତାରେ ସେ ନକଲି ସାର୍ଟିଫିକେଟ୍ ପ୍ରସ୍ତୁତ କରୁଥିଲେ। ଏହା ଜଣାପଡ଼ିବା ପରେ ପୋଲିସ ତାଙ୍କ ଘର ଏବଂ ଦୋକାନରେ ଚଢ଼ାଉ କରି ବହୁ ଆପତ୍ତିଜନକ କାଗଜପତ୍ର, ସାମଗ୍ରୀ ଜବତ କରିଛି। ଏଥିରେ ଓଡ଼ିଶା ସମେତ ରାଜ୍ୟ ବାହାରର ବିଭିନ୍ନ ଶିକ୍ଷାନୁଷ୍ଠାନର ନକଲି ସାର୍ଟିଫିକେଟ୍, ବିଭିନ୍ନ ପ୍ରକାର ଲୋଗୋ, ଅଧିକାରୀଙ୍କ ଷ୍ଟାମ୍ପ, କମ୍ପ୍ୟୁଟର, ହାର୍ଡଡିସ୍କ ଆଦି ରହିଛି। ପ୍ରଶାନ୍ତଙ୍କ ନାମରେ ଏଭଳି ଅଭିଯୋଗ ପ୍ରଥମ ନୁହେଁ। ପୂର୍ବରୁ ମଧ୍ୟ ନକଲି ସାର୍ଟିିଫିକେଟ୍ କାରବାରରେ ତାଙ୍କର ସମ୍ପୃକ୍ତି ଥିବା ପୋଲିସ ନିକଟରେ ଅଭିଯୋଗ ହୋଇଥିଲା। ଏଭଳି ବେଆଇନ କାରବାରରେ କେବଳ ପ୍ରଶାନ୍ତ ସାମିଲ ଅଛନ୍ତି ନା ତାଙ୍କୁ ଅନ୍ୟ କେହି ସହଯୋଗ କରୁଥିଲେ , ଏହାର ଚେର କେଉଁ ପର୍ଯ୍ୟନ୍ତ ଲମ୍ବିଛି ଏବଂ ଚାକିରି ଆଶାୟୀମାନେ ନକଲି ସାର୍ଟିଫିକେଟ୍ ଦାଖଲ କରିଛନ୍ତି କି ନାହଁ, ତାହା ଜାଣିବା ପୋଲିସ ପାଇଁ ଚାଲେଞ୍ଜ ପାଲଟିଛି। ଏହା ଏକ ସମ୍ବେଦନଶୀଳ ମାମଲା ହୋଇଥିବାରୁ ପୋଲିସ ସତର୍କତାର ସହ ଆଗକୁ ବଢୁଛି।
ଏ ସଂକ୍ରାନ୍ତରେ ଏସ୍ପି ଜ୍ଞାନରଞ୍ଜନ ମହାପାତ୍ର କୁହନ୍ତି, ବ୍ରହ୍ମପୁରରେ ଗିରଫ ହୋଇଥିବା ଅଭିଯୁକ୍ତଙ୍କ ସମ୍ପର୍କରେ ଅଦ୍ୟାବଧି କୌଣସି ରିପୋର୍ଟ ଆସିନାହିଁ। ରିପୋର୍ଟ ଆସିବା ପରେ ତଦନୁଯାୟୀ ତଦନ୍ତ କରାଯିବ। କିନ୍ତୁ ପୋଲିସ ପକ୍ଷରୁ ଢେଙ୍କାନାଳରେ ଜାଲ ସାର୍ଟିଫିକେଟ୍ ଲିଙ୍କ୍କୁ ନେଇ ଖୋଳତାଡ଼ କରାଯିବ ବୋଲି ଏସ୍ପି କହିଛନ୍ତି।
