ନୂଆଦିଲ୍ଲୀ,୨୬-୪: ମୁକେଶ ଅମ୍ବାନୀଙ୍କ ମାଲିକାନାରେ ଥିବା ରିଲାଏନ୍ସ ଜିଓ ଆରମ୍ଭ ହେବାର ମାତ୍ର ଅଢ଼େଇ ବର୍ଷ ମଧ୍ୟରେ ଆଉ ଏକ ସଫଳତା ହାସଲ କରିଛି। ଗ୍ରାହକ ସଂଖ୍ୟା ଆଧାରରେ ଏହା ଭାରତୀ ଏୟାରଟେଲକୁ ପଛରେ ପକାଇ ଦେଶର ଦ୍ୱିତୀୟ ସର୍ବବୃହତ ଟେଲିକମ୍ କମ୍ପାନୀ ହୋଇଛି। ନଂ ୧ କମ୍ପାନୀ ହେବାଠାରୁ ଏହା ପାଦେ ଦୂରରେ ରହିଛି। ୩୦.୬ କୋଟି ଗ୍ରାହକ ସହ ଜିଓ ଦ୍ୱିତୀୟ ସ୍ଥାନରେ ରହିଥିବା ବେଳେ ଭୋଡ଼ାଫୋନ-ଆଇଡିଆ ପ୍ରଥମ ସ୍ଥାନରେ ରହିଛି। ଏୟାରଟେଲ ନିକଟରେ ୨୮.୪ କୋଟି ଗ୍ରାହକ ରହିଥିବା ବେଳେ ଭୋଡ଼ାଫୋନ-ଆଇଡିଆ ନିକଟରେ ଡିସେମ୍ବର ୨୦୧୮ ସୁଦ୍ଧା ୩୮.୭ କୋଟି ଗ୍ରାହକ ରହିଛି। ଏୟାରଟେଲ ଗ୍ରାହକ ସଂଖ୍ୟା ସ୍ବୀକାର କରିଛି। ଜଣେ ଟେଲିକମ୍ ବିଶେଷଜ୍ଞ କହିଛନ୍ତି ଯେ, ଜିଓ ଖୁବଶୀଘ୍ର ଭୋଡ଼ାଫୋନ-ଆଇଡିଆକୁ ପଛରେ ପକାଇ ଦେବ। ଏଥିପାଇଁ କମ୍ପାନୀକୁ ୩ରୁ ୪ ତ୍ରୈମାସ ସମୟ ଲାଗିବ। ସୂଚନାଥାଉ କି, ଭାରତୀୟ ଟେଲିକମ୍ ସେକ୍ଟରରେ ଦୁଇ ଦଶନ୍ଧି ଧରି ଏୟାରଟେଲ ସର୍ବବୃହତ କମ୍ପାନୀ ସ୍ଥାନ ଦଖଲରେ ରଖିଥିଲା। ତେବେ ଭୋଡ଼ାଫୋନ-ଆଇଡିଆ ମିଶ୍ରଣ ପରେ ଏହା ଦ୍ୱିତୀୟ ସ୍ଥାନକୁ ଖସିଆସିଥିଲା। ଏବେ ଜିଓ ଦ୍ୱିତୀୟ ସ୍ଥାନକୁ ଉଠିଆସିଛି। ଅତ୍ୟନ୍ତ ଶସ୍ତା ଟାରିଫ ପ୍ଲାନ ଯୋଗୁ ଜିଓ ଉକ୍ତ ଉପଲବ୍ଧି ହାସଲ କରିପାରିଛି।
