ବରଗଡ଼ ଅଫିସ,୧୯।୧୧: ଖରିଫ ଧାନ କିଣାବିକାରେ ଟୋକନ ବ୍ୟବସ୍ଥାକୁ ବିରୋଧକରି ମଙ୍ଗଳବାର ଚାଷୀମାନେ ବରଗଡ଼ ଜିଲାପାଳଙ୍କ ଅଫିସରେ ତାଲା ପକାଇଛନ୍ତି। ଓଡ଼ିଶା ରାଜ୍ୟ କୃଷକ ସଂଗଠନର ସଭାପତି ଗୌରଚନ୍ଦ୍ର ଖମାରୀଙ୍କ ନେତୃତ୍ୱରେ ଶତାଧିକ ଚାଷୀ ଜିଲାପାଳ ଅଫିସକୁ ଯାଇଥିଲେ। ତେବେ ସେମାନେ ପହଞ୍ଚିବା ପୂର୍ବରୁ ପୋଲିସ ଜିଲାପାଳ ଅଫିସ ମୁଖ୍ୟ ଫାଟକ ବନ୍ଦକରି ରଖିଥିଲା। ଜିଲାପାଳ ଚାଷୀମାନଙ୍କ ସମ୍ମୁଖକୁ ଆସି ଟୋକନ ବ୍ୟବସ୍ଥା ଉପରେ ମତ ରଖିବାକୁ ସେମାନେ ଦାବି କରିଥିଲେ। ମାତ୍ର ଜିଲାପାଳ ଜ୍ୟୋତିରଞ୍ଜନ ପ୍ରଧାନ ଅନୁପସ୍ଥିତ ଥିବା ଯୋଗୁ ସେଠାକୁ ଆସି ପାରି ନ ଥିଲେ। ପରେ ପୋଲିସ ବାରଣ କରିବା ସତ୍ତ୍ୱେ ଚାଷୀମାନେ ତାଲା ପକାଇବାକୁ ଅଡି ବସିଥିଲେ। ଯୁବନେତା ନିପନ କୁମାର ଦାଶ ଜିଲାପାଳ ଅଫିସ ମୁଖ୍ୟ ଫାଟକରେ ତାଲା ପକାଇଥିଲେ। ଏହା ପୂର୍ବରୁ ଚାଷୀମାନେ ସିଏସ୍ଓ ଏବଂ ଡିଆର୍ସିଏସ୍ ଅଫିସରେ ତାଲା ପକାଇଥିଲେ। ଚାଷୀନେତା ଲକ୍ଷ୍ମଣ ପ୍ରଧାନ ପ୍ରମୁଖ ଏଥିରେ ସକ୍ରିୟ ଅଂଶଗ୍ରହଣ କରିଥିଲେ।
