ଟିଟିଲାଗଡ, ୭।୫(ଡି.ଏନ.ଏ.): କରୋନା ମହାମାରୀ ନେଇ ବଲାଙ୍ଗୀର ଜିଲାପାଳ ଅରିନ୍ଦମ ଡାକୁଆ, ଏସ୍ପି ସନ୍ଦୀପ ସମ୍ପଦ, ଜିଲା ଗ୍ରାମ୍ୟ ଉନ୍ନୟନ ସଂସ୍ଥା ପ୍ରକଲ୍ପ ନିର୍ଦ୍ଦେଶକ ଡ. ମହେଶ୍ୱର ସ୍ବାଇଁ ଗୁରୁବାର ଟିଟିଲାଗଡ ଗସ୍ତରେ ଆସି ସ୍ଥିତି ସମୀକ୍ଷା କରିଛନ୍ତି। ଏନେଇ ଟିଟିଲାଗଡ ଉପଜିଲାପାଳ ସୁଧାକର ନାୟକ, ବିଡିଓ ନବୀନ ଚନ୍ଦ୍ର ନାୟକ, ଏସଡିପିଓ ସୁରେନ୍ଦ୍ର ନାରାୟଣ ଶତପଥୀ ତଥା ବିଭିନ୍ନ ବିଭାଗୀୟ ଅଧିକାରୀଙ୍କ ସହ କରୋନା ମୁକାବିଲା ନେଇ ଆଲୋଚନା କରିଥିଲେ। ପରେ ଟିଟିଲାଗଡ ରେଳ ଷ୍ଟେଶନ ପରିଦର୍ଶନ କରିଥିଲେ। ବାହାର ରାଜ୍ୟର ଶ୍ରମିକଙ୍କୁ ଟ୍ରେନରେ ଟିଟିଲାଗଡ ଆଣି ବିଭିନ୍ନ ଅଞ୍ଚଳକୁ ପଠାଇବାକୁ ପ୍ରଶାସନର ଯୋଜନା ରହିଥିବା ଜଣାପଡିଛି। ପରେ ଜିଲାପାଳ ଏବଂ ଏସପି ଟିଟିଲାଗଡ ବ୍ଲକ ଅନ୍ତର୍ଗତ କତରକେଲା ସଙ୍ଗରୋଧ କେନ୍ଦ୍ର ପରିଦର୍ଶନ କରିଥିବା ଉପଖଣ୍ଡ ସୂଚନା ଓ ଲୋକସମ୍ପର୍କ ଅଧିକାରୀ ମନୋଜ ବେହେରା ସୂଚନା ଦେଇଛନ୍ତି। ସହରର ମଧ୍ୟଭାଗରେ ରହିଥିବା ଟିଟିଲାଗଡ ରେଳ ଷ୍ଟେଶନରେ ବାହାର ରାଜ୍ୟରେ ରହୁଥିବା ଓଡିଆ ଶ୍ରମିକଙ୍କୁ ଆଣି ଓହ୍ଲାଇବାକୁ ପ୍ରଶାସନର ଯୋଜନା ନେଇ ସ୍ଥାନୀୟ ଲୋକଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ଏନେଇ ପୂର୍ବତନ ନଗରପାଳ ଗୋବର୍ଦ୍ଧନ ନାଗ ଉପଜିଲାପାଳଙ୍କୁ ସାକ୍ଷାତ ସହ ନାଗିରକଙ୍କ ଅସନ୍ତୋଷ ନେଇ ଅବଗତ କରିଛନ୍ତି। ରେଳ ଷ୍ଟେଶନ ମଧ୍ୟସ୍ଥଳରେ ରହିଥିବାରୁ ହଜାର ହଜାର ସଂଖ୍ୟାରେ ଶ୍ରମିକ ଆସିଲେ ସଂକ୍ରମଣ ଆଶଙ୍କା ରହିଥିବା ନାଗ କହିଛନ୍ତି।
