ଅନୁଗୋଳ ଅଫିସ, ୨୩।୮-ଜାତୀୟ ସ୍ବାସ୍ଥ୍ୟ ମିଶନର ଏକ ୫ ଜଣିଆ ଟିମ୍ ଗୁରୁବାର ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟ ସହ ଜିଲାର ଅନ୍ୟ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ପରିଦର୍ଶନ କରିଛନ୍ତି। ଚିକିତ୍ସାଳୟଗୁଡ଼ିକରେ ସରକାରୀ ଯୋଜନା କିପରି କାର୍ଯ୍ୟକାରୀ ହେଉଛି ଉକ୍ତ ଟିମ୍ ତାହାର ଅନୁଧ୍ୟାନ କରିଥିଲେ। ସେହିପରି ଜିଲା ମୁଖ୍ୟ ଚିକିତ୍ସାଳୟର ଭିତ୍ତିଭୂମି ମଧ୍ୟ ବୁଲି ଦେଖିଥିଲେ। ଏହାପରେ ପ୍ରସୂତି ଓ ଶିଶୁ ସ୍ବାସ୍ଥ୍ୟ ୱାର୍ଡ ପରିଦର୍ଶନ କରିଥିଲେ। ତେବେ ମୁଖ୍ୟ ଚିକିତ୍ସାଳୟରେ ଥିବା ନାନା ଅବ୍ୟବସ୍ଥା ଦେଖି କମିଟି ଅସନ୍ତୋଷ ପ୍ରକାଶ କରିଥିବା ଜଣାପଡ଼ିଛି।
ଏହି କମିଟିରେ ରାଜ୍ୟ ମାତୃ ସ୍ବାସ୍ଥ୍ୟ ପରାମର୍ଶଦାତା ସରୋଜ ପାଣିଗ୍ରାହୀଙ୍କ ସହ ରାଜ୍ୟ ଅର୍ଥ ପରିଚାଳକ ମଳୟ କୁମାର ପାଣିଗ୍ରାହୀ, ରାଜ୍ୟ ତଥ୍ୟ ପରିଚାଳକ ଶଶିଭୂଷଣ ଜେନା, ଗଁା କଲ୍ୟାଣ ସମିତିର ସହ ପରିଚାଳକ ବିକ୍ରମ କୁମାର ପ୍ରଧାନ, ଜିଲା ମାତୃ ଓ ପ୍ରଜନନ ଶିଶୁ ସ୍ବାସ୍ଥ୍ୟ ପରିଚାଳକ ସୂର୍ଯ୍ୟନାରାୟଣ ମାନସିଂହ ସାମିଲ ଥିଲେ। ଏହି ଟିମ୍ ପ୍ରଥମେ ଜିଲା ମୁଖ୍ୟ ଚିକିତ୍ସାଳୟ ପରିଦର୍ଶନ କରିଥିଲେ। ପରେ ପାଲଲହଡ଼ା, ଛେଣ୍ଡିପଦା, କଣିହଁା, ବନ୍ତଳା ଅଞ୍ଚଳରେ ଥିବା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଯାଇ ଚିକିତ୍ସା ବ୍ୟବସ୍ଥା ତଦାରଖ କରିଥିଲେ। ବନ୍ତଳା ସ୍ବାସ୍ଥ୍ୟକେନ୍ଦ୍ର ପରିଦର୍ଶନ ବେଳେ ଏହି ଟିମ୍ ପ୍ରସବ କକ୍ଷ, ଅନ୍ତର୍ବିଭାଗ, ବହିର୍ବିଭାଗ, ବ୍ଲକ କାର୍ଯ୍ୟକ୍ରମ ପରିଚାଳନା ବିଭାଗ, ଔଷଧ ବିତରଣ କକ୍ଷ, ଟିକା ସଂରକ୍ଷଣ ଗୃହ ଆଦି ପରିଦର୍ଶନ କରିଥିଲେ। ସ୍ବାସ୍ଥ୍ୟକେନ୍ଦ୍ର ଦ୍ୱାରା ଭବିଷ୍ୟତରେ ଜନସାଧାରଣଙ୍କୁ କିପରି ଆହୁରି ଉନ୍ନତମାନର ସ୍ବାସ୍ଥ୍ୟ ସେବା ଯୋଗାଇ ଦିଆଯିବ ସେ ନେଇ କାର୍ଯ୍ୟ କରିବାକୁ ସ୍ବାସ୍ଥ୍ୟକେନ୍ଦ୍ର କର୍ମଚାରୀଙ୍କୁ ପରାମର୍ଶ ଦେଇଥିଲେ। ସେହିପରି ମୁଖ୍ୟ ଚିକିତ୍ସାଳୟ ପରିଦର୍ଶନ ସମୟରେ ସିଡିଏମ୍ଓ ପ୍ରତାପ କୁମାର ବେହେରା, ଏଡିଏମ୍ଓ ମେଡିକାଲ ଲକ୍ଷ୍ମୀନାରାୟଣ ବିଶୋଇ ଓ ଅନ୍ୟ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ। ଏ ନେଇ ଜିଲା ମୁଖ୍ୟ ଚିକିତ୍ସାଧିକାରୀ ବେହେରା କହିଛନ୍ତି, ପ୍ରତିବର୍ଷ ଟିମ୍ ଏପରି ତଦାରଖ କରିବାକୁ ଆସିଥାନ୍ତି। ଆସିଥିବା ୫ ଜଣିଆ ଟିମ୍ ସ୍ବାସ୍ଥ୍ୟ କେନ୍ଦ୍ରଗୁଡ଼ିକୁ ଭଲ ରିମାର୍କ ଦେଇଛନ୍ତି।
