ବେଙ୍ଗାଲୁରୁ, ୧।୧୨: ଉତ୍ତର ବେଙ୍ଗାଲୁରୁରେ ଏକ ଅଭାବନୀୟ ଘଟଣା ଘଟିଛି। ଏଠାରେ ଜଣେ ୬୦ ବର୍ଷୀୟ ମହିଳା ମାତ୍ର ୭ ଦିନର ନାତୁଣୀକୁ ତଣ୍ଟି ଚିପି ହତ୍ୟା କରିଛନ୍ତି। ଜ୍ୟୋତିଷଙ୍କ କଥାରେ ପଡି ସେ ଏଭଳି କାଣ୍ଡ କରିଥିବା ପୋଲିସ ଆଗରେ କହିଛନ୍ତି। ସୂଚନାଯୋଗ୍ୟ, ମେଦାରହଲ୍ଲୀ ନିବାସୀ ପରମେଶ୍ୱରୀ ନାମକ ଜଣେ ମହିଳାଙ୍କ ପୁଅ ମାର୍ଶଲ ନଭେମ୍ବର ୨୨ରେ ଏକ କନ୍ୟା ସନ୍ତାନର ଜନକ ହୋଇଥିଲେ। ଏଥିରେ ଦୁଃଖି ଥିଲେ ତାଙ୍କ ମା’। ଘଟଣାଦିନ ଶିଶୁଟିର ମା’ ଗାଧୋଇବାକୁ ଯାଇଥିବା ବେଳେ ଜେଜେମା’ ନାତୁଣୀର ତଣ୍ଟି ଚିପି ମାରିଦେଇ ପାଖ ନାଳରେ ପକାଇଥିଲେ। ଅଜଣା ବ୍ୟକ୍ତି ଜଣେ କିଏ ଶିଶୁଟିକୁ ନେଇଯାଇଥିବା ଘର ଲୋକଙ୍କ ଆଗରେ କହିଥିଲେ ପରମେଶ୍ୱରୀ। ପରେ ପୋଲିସ ଥାନରେ ଏତଲା ଦିଆଯିବାରୁ ତଦନ୍ତ ଆରମ୍ଭ ହୋଇଥିଲା। ନାତୁଣୀ ହେଲେ କାଳେ ଘରର ଆର୍ଥିକ ମାନ୍ଦାବସ୍ଥା ଲାଗିରହିବ ବୋଲି ଜ୍ୟୋତିଷ ତାଙ୍କୁ କହିଥିଲେ। ଏହି କାରଣରୁ ନାତୁଣୀକୁ ତଣ୍ଟି ଚିପି ମାରିଦେଇଥିଲେ ପୋଲିସ ଆଗରେ ଦୋଷ ସ୍ବୀକାର କରିଥିଲେ ପରମେଶ୍ୱରୀ। ଏହି ମାମଲାରେ ପୋଲିସ ତାଙ୍କୁ ଗିରଫ କରିଛି।
