ରଣପୁର,୬ା୪(ସ୍ବ.ପ୍ର.): କରୋନା ପାଇଁ ସହାୟତା ଅର୍ଥ ପାଇବା ଲାଗି ରାଶନ କାର୍ଡଧାରୀଙ୍କୁ ଡିଲରଙ୍କ ପାଖକୁ ଦୁଇଥର ଦୌଡିବାକୁ ପଡୁଛି। ଥରେ ଟଙ୍କା ପାଇଁ ଓ ପୁଣି ଥରେ ଚାଉଳ ଲାଗି ଯିବାକୁ ପଡୁଛି। ଏଥିପାଇଁ ହିତାଧିକାରୀଙ୍କୁ ଲାଇନ୍ରେ ଘଣ୍ଟା ଘଣ୍ଟା ଧରି ଠିଆ ହେବାକୁ ପଡୁଛି। ଏପରି ଅବସ୍ଥା ପାଇଁ ଖୋର୍ଦ୍ଧାର ଜରାଶ୍ରମରେ ରହୁଥିବା ନୟାଗଡ ଜିଲା ରଣପୁର ଏନ୍ଏସି ବଳଭଦ୍ରପୁରର ବ୍ରଜ କିଶୋର ବେହେରାଙ୍କ ଦମ୍ପତି ବେଶି ହଟହଟା ହେଉଛନ୍ତି। ଯାନବାହନ ଚଳାଚଳ ବନ୍ଦ ଥିବାବେଳେ ଏକ ଅଟୋକୁ ୪୦୦ ଟଙ୍କାରେ ଭଡାକୁ ଆଣି କିଶୋର ଖୋର୍ଦ୍ଧା ହାଟବସ୍ତ ଜରା ନିବାସରୁ ରଣପୁର ଡିଲରଙ୍କ ପାଖକୁ ଆସିଥିଲେ। ସୋମବାର ପ୍ରାୟ ୩ ଘଣ୍ଟା ଲାଇନ୍ରେ ଠିଆ ହେବା ପରେ କିଶୋର ଓ ଯଶୋଦା ୧ ହଜାର ଟଙ୍କା ନେଇଥିଲେ। ସେମାନେ ଚାଉଳ ଦେବା ପାଇଁ ଡିଲରଙ୍କୁ ନେହୁରା ହୋଇଥିଲେ ମଧ୍ୟ ମିଳି ନାହିଁ। ତେଣୁ କିଛିଦିନ ପରେ ପୁଣି ଏହି ଦମ୍ପତି ୫ କେଜି ଲେଖାଏ ୧୦ କେଜି ଚାଉଳ ପାଇଁ ଅଟୋ ଭଡା କରି ଆସିବେ ବୋଲି କହିଛନ୍ତି। ପ୍ରଶାସନ ପକ୍ଷରୁ ଯଦି ରାଶନକାର୍ଡଧାରୀଙ୍କୁ ଏକା ସଙ୍ଗରେ ଚାଉଳ ଓ ଟଙ୍କା ପ୍ରଦାନ କରାଯାଆନ୍ତା ତେବେ ଏହି ଦମ୍ପତିଙ୍କ ପରି ବହୁ ଲୋକ ଉପକୃତ ହୋଇପାରନ୍ତେ ବୋଲି ମତପ୍ରକାଶ ପାଉଛି।
