ଲଣ୍ଡନ,୨୦ା୫ (ଏଏଫ୍ପି)-ୟୁକ୍ରେନ୍ର ପୂର୍ବତନ ପ୍ରଫେସନାଲ ବକ୍ସର ଲାଡିମିର କ୍ଲିଚ୍କୋଙ୍କ ଆଦର୍ଶ ଅନୁକରଣ କରିବେ ବୋଲି କହିଛନ୍ତି ଟାଇସନ ଫ୍ୟୁରି। ଜଣେ ବ୍ରିଟିଶ ବକ୍ସର ହିସାବରେ ପ୍ରାଧାନ୍ୟ ବିସ୍ତାର କରି ଅବସର ପର୍ଯ୍ୟନ୍ତ ଜଣେ ବିଶ୍ୱ ଚାମ୍ପିୟନ ହେବାକୁ ଚାହାନ୍ତି। ଏକ ସାକ୍ଷାତ୍କାର ବେଳେ ସେ ଏକଥା ପ୍ରକାଶ କରିଛନ୍ତି। ୨୦୧୫ରେ ଫ୍ୟୁରିଙ୍କଠାରୁ ପରାସ୍ତ ହେବା ପୂର୍ବରୁ କ୍ଲିଚ୍କୋ ୪ବର୍ଷଧରି ନିର୍ବିବାଦୀୟ ବିଶ୍ୱ ଚାମ୍ପିୟନ ଥିଲେ। ମାନସିକ ସ୍ବାସ୍ଥ୍ୟ ସମସ୍ୟା ଯୋଗୁ ଫ୍ୟୁରି କିନ୍ତୁ ସେହି ଟାଇଟଲଗୁଡ଼ିକ ବଜାୟ ରଖିପାରିଲେନି। ମାତ୍ର ପରେ ସେ ଜୋରଦାର୍ ପ୍ରତ୍ୟାବର୍ତ୍ତନ କରିଥିଲେ। ଫେବୃୟାରୀରେ ଡିଅନ୍ଟେ ଓ୍ବାଇଲ୍ଡରଙ୍କ ବିପକ୍ଷରେ ଚମତ୍କାର ବିଜୟ ପରେ ୩୧ ବର୍ଷୀୟ ଫ୍ୟୁରି ବକ୍ସିଂରେ ଶୀର୍ଷରେ ରହିବାକୁ ଚାହୁଁଛନ୍ତି। କରୋନାଭାଇରସ୍ ସଙ୍କଟ ଦୂରୀଭୂତ ହେବା ପରେ ଓ୍ବାଇଲ୍ଡର ତାଙ୍କ ସହିତ ପୁଣି ଲଢେଇ କରିବାକୁ ଚାହୁଁଛନ୍ତି। ଏହା ପରେ ୨୦୨୧ରେ ଏକ ବାଉଟ୍ରେ ସେ ବ୍ରିଟିଶ ପ୍ରତିଦ୍ୱନ୍ଦ୍ୱୀ ଆନ୍ଥୋନୀ ଜୋଶୁଆଙ୍କ ସହିତ ମୁକାବିଲା କରିବେ। ଜୋଶୁଆ ଡବ୍ଲ୍ୟୁବିଏ, ଆଇବିଏଫ୍, ଡବ୍ଲ୍ୟୁବିଓ ଏବଂ ଆଇବିଓ ଓ୍ବାଲର୍ଡ ଟାଇଟଲ ହାସଲ କରିଛନ୍ତି। ଫ୍ୟୁରି କହିଛନ୍ତି ମୁଁ ଅର୍ଥ, ସୁନାମ କିମ୍ବା ବେଲ୍ଟ ପାଇଁ ବକ୍ସିଂରୁ ନାହିଁ। ବରଂ ମୁଁ ବକ୍ସିଂକୁ ଖୁବ୍ ଭଲ ପାଏ। ଏଥିରୁ ମୋତେ ମାନସିକ ଶାନ୍ତି ମିଳେ।
