ଢେଙ୍କାନାଳ ଅଫିସ, ୧୨।୯ – ଲଘୁଚାପଜନିତ ଲଗାଣ ବର୍ଷାରେ ଢେଙ୍କାନାଳ ସହରର ସ୍ଥିତି ସଙ୍ଗିନ ହୋଇପଡ଼ିଛି। ଟାଉନପ୍ଲାନିଂ ଅଞ୍ଚଳରେ କୃତ୍ରିମ ବନ୍ୟା ପରିସ୍ଥିତି ସୃଷ୍ଟି ହୋଇଛି। ଅଞ୍ଚଳବାସୀ ଜଳବନ୍ଦୀ ଅବସ୍ଥାରେ ଅଛନ୍ତି। କଲୋନୀ ରାସ୍ତାରେ ଆଣ୍ଠୁଏ ଉଚ୍ଚତାର ପାଣି ଚାଲୁଛି। ଲୋକମାନେ ଘରୁ ବାହାରିବା କଷ୍ଟକର ହୋଇପଡ଼ିଛି। କେତେକ ସ୍ଥାନରେ ଘରେ ବର୍ଷାଜଳ ପଶିଛି। ବାରମ୍ବାର ଦୃଷ୍ଟି ଆକର୍ଷଣ କରାଯିବା ସତ୍ତ୍ୱେ ଏହାର ପ୍ରତିକାର ହେଉ ନ ଥିବାରୁ ଏହାକୁ ନେଇ ଅସନ୍ତୋଷ ବଢ଼ିବାରେ ଲାଗିଛି।
ଅଞ୍ଚଳବାସୀଙ୍କ କହିବା କଥା, ଢେଙ୍କାନାଳ ଆଞ୍ଚଳିକ ଉନ୍ନୟନ ସଂସ୍ଥା (ଡ୍ରିଟ୍) ପକ୍ଷରୁ ନିର୍ମିତ ଟାଉନ ପ୍ଲାନିଂ ଅଞ୍ଚଳରେ ଜଳ ନିଷ୍କାସନ ଲାଗି କୌଣସି ବ୍ୟବସ୍ଥା କରାଯାଇନାହିଁ। ଫଳରେ ବର୍ଷାଦିନେ ଜଳ ନିଷ୍କାସନ ହୋଇ ନ ପାରି ସ୍ଥିତି ସାଂଘାତିକ ହୋଇପଡୁଛି। ଦୀର୍ଘଦିନ ଧରି ବର୍ଷାପାଣି ଜମି ରହୁଥିବାରୁ ଅସ୍ବାସ୍ଥ୍ୟକର ପରିବେଶ ସୃଷ୍ଟି ହେଉଛି। ସମସ୍ୟା ସମାଧାନ ଦାବିରେ ଆନ୍ଦୋଳନତ୍ମକ ପନ୍ଥା ଗ୍ରହଣ କରାଯାଇଛି। ତଥାପି ଏହାର ସ୍ଥାୟୀ ପ୍ରତିକାର ଲାଗି ପଦକ୍ଷେପ ନିଆଯାଉ ନ ଥିବା ସେମାନେ ଅଭିଯୋଗ କରିଛନ୍ତି।
ଏ ନେଇ ପୌରସଂସ୍ଥା ନିର୍ବାହୀ ଅଧିକାରୀ ଅତନୁ କୁମାର ସାମନ୍ତ କୁହନ୍ତି, ଡ୍ରିଟ୍ ପକ୍ଷରୁ ଟାଉନ ପ୍ଲାନିଂ ଅଞ୍ଚଳରେ ଘର ନିର୍ମାଣ କାର୍ଯ୍ୟ ଚାଲିଥିବାବେଳେ ବିଭାଗୀୟ କର୍ତ୍ତୃପକ୍ଷ ଡ୍ରେନେଜ୍ ବ୍ୟବସ୍ଥା ପାଇଁ କୌଣସି ଯୋଜନା ପ୍ରସ୍ତୁତ କରି ନ ଥିଲେ। କିଛି ବର୍ଷ ହେଲା ଏହାର ଉନ୍ନୟନ ଦାୟିତ୍ୱ ପୌରସଂସ୍ଥା ଅଧୀନକୁ ଆସିଛି। ଡ୍ରେନେଜ୍ ପାଇଁ ଜାଗା ଖୋଜା ଚାଲିଛି। ନିକଟରେ ଜିଲାପାଳଙ୍କ ଅଧ୍ୟକ୍ଷତାରେ ସହରର ଡ୍ରେନେଜ୍ ବ୍ୟବସ୍ଥା ଏବଂ ମାଷ୍ଟର ପ୍ଲାନ ନିର୍ଦ୍ଧାରିତ ହୋଇଥିଲା। ଏହାର ସମୀକ୍ଷା ପାଇଁ ସମସ୍ତ ବିଭାଗକୁ ନେଇ ଜରୁରୀ ବୈଠକ କରାଯିବାକୁ ନିଷ୍ପତ୍ତି ହୋଇଛି।
