କୋଲକାତା,୨୪।୧୨: ୨୦୨୧ରେ ହେବାକୁ ଥିବା ଓ୍ବେଷ୍ଟ ବେଙ୍ଗଲ ବିଧାନସଭା ନିର୍ବାଚନ ପାଇଁ ପ୍ରସ୍ତୁତି ଆରମ୍ଭ କରି ଦେଇଛି କଂଗ୍ରେସ। ବାମ ପନ୍ଥୀ ଦଳ( ସିପିଏମ୍ )ର ହାତ ଧରିବ କଂଗ୍ରେସ। ଏଥି ନେଇ ଆବଶ୍ୟକ ମଞ୍ଜୁରୀ ଦେଇସାରିଛନ୍ତି କଂଗ୍ରେସ ଦଳର ହାଇ କମାଣ୍ଡ। ରାଜ୍ୟ କଂଗ୍ରେସ ମୁଖ୍ୟ ଅଧିର ରଞ୍ଜନ ଚୌଧୁରୀ ଗୁରୁବାର ଘୋଷଣା କରିଛନ୍ତି। ଗତ ଅକ୍ଟୋବରରେ ପଶ୍ଚିମ ବଙ୍ଗ ବିଧାନସଭା ନିର୍ବାଚନ ଲାଗି କଂଗ୍ରେସ ସହ ମିଶିବାକୁ ନିଷ୍ପତ୍ତି ନେଇଥିଲା ସିପିଏମ୍ ସେଣ୍ଟ୍ରଲ କମିଟି। ଆଗାମୀ ନିର୍ବାଚନରେ ତୃଣମୂଳ କଂଗ୍ରେସ (ଟିଏମ୍ସି) ଓ ଭାଜପା ମଧ୍ୟରେ ହେବ ମୁଖ୍ୟ ପ୍ରତିଦ୍ୱନ୍ଦ୍ୱିତା।
୨୦୧୯ ଲୋକସଭା ନିର୍ବାଚନ ପୂର୍ବରୁ ଦୁଇ ଦଳ ମଧ୍ୟରେ ଆଲୋଚନା ହୋଇଥିଲା। ମାତ୍ର ଛିଣ୍ଡି ନ ଥିଲା ଆସନ ଭାଗବଣ୍ଟା। ୨୦୧୬ରେ ନିର୍ବାଚନରେ ଦୁଇ ଦଳ ଏକାଠି ଲଢ଼ି ୨୯୪ ବିଧାନସଭା ଆସନରୁ ୭୬ଟି ଜିତିଥିଲା।
ଉଲ୍ଲେଖଥାଉ ଯେ, ବାମ ପନ୍ଥୀ ଦଳ ଲୋକସଭା ନିର୍ବାଚନରେ ୩୯ ଆସନରେ ପାର୍ଥୀ ଦେଇଥିଲା । ଗୋଟିଏ ହେଲେ ସିଟ୍ ହାତେଇ ପାରି ନ ଥିଲା ସିପିଏମ୍। ଅନ୍ୟପକ୍ଷରେ ୩୮ ଆସନରେ ପ୍ରତିଦ୍ୱନ୍ଦ୍ୱିତା କରିଥିବା କଂଗ୍ରେସ ଭାଗରେ ପଡ଼ିଥିଲା କେବଳ ୨ଟି ଆସନ। ୪୦ ଲୋକସଭା ଆସନ ବିଶିଷ୍ଟ ପଶ୍ଚିମ ବଙ୍ଗରେ ଶାସକ ଟିଏମ୍ସି ଦଳ ନିକଟରେ ସର୍ବାଧିକ ୨୨ଟି ସାଂସଦ ଥିବାବେଳେ ୧୮ଟି ଆସନରେ ଜିତିଥିଲା ଭାଜପା।
