ପୁରୀ ଅଫିସ, ୪ା୫: ମହାମାରୀ କରୋନା ବିରୋଧରେ ଲଢୁଛି ସମଗ୍ର ବିଶ୍ୱ। ଏହି ଲଢେଇ ମଇଦାନରେ କିଏ ଆଗ ଧାଡ଼ିରେ ଛିଡ଼ା ହୋଇଛି ତ ପୁଣି କେହି ଘରେ ରହି ବି ଏଥିରେ ସାମିଲ ହୋଇଛି। ଏମିତି ଜଣେ କମ୍ ବୟସର ନିଆରା ଯୋଦ୍ଧା ହେଉଛନ୍ତି ପୁରୀ ଗଙ୍ଗାରାମ ନୂଆସାହିର ଅଙ୍କିତା ଦାସ। ଏବେ ସେ ନରେନ୍ଦ୍ରକୋଣ ମହିଳା ମହାବିଦ୍ୟାଳୟର ଯୁକ୍ତ ଦୁଇ ଛାତ୍ରୀ। ସେ କଳା ମାଧ୍ୟମରେ ସଚେତନତାର ବାର୍ତ୍ତା ବାଣ୍ଟୁଛନ୍ତି। ମା’ ଦୁର୍ଗତିନାଶିନୀଙ୍କ ଚିତ୍ରକଳାକୁ ନେଇ ପ୍ରସ୍ତୁତ କରିଛନ୍ତି ଟିକ୍ଟକ୍। ଏଥିରେ ମା’ କିପରି ବିଭିନ୍ନ ଅସ୍ତ୍ରଶସ୍ତ୍ରରେ ସଜ୍ଜିତ ହୋଇ କରୋନା ଭୂତାଣୁକୁ ହତ୍ୟା କରୁଛନ୍ତି ତାହା ଦେଖିବାକୁ ମିଳୁଛି। କେବଳ ଟିକ୍ଟକ ନୁହେଁ, ଚିତ୍ରକଳା ମାଧ୍ୟମରେ ବି ଲୋକଙ୍କୁ ସଚେତନ କରିଛନ୍ତି। ଅତ୍ୟାବଶ୍ୟକ କାମ ନ ଥିଲେ ଘରୁ ବାହାରିବା ନାହିଁ, ଘରୁ ବାହାରିଲେ ମୁହଁରେ ମାସ୍କ ପିନ୍ଧିବା, ହାତକୁ ବାରମ୍ବାର ସାବୁନରେ ଧୋଇବା, ସାମାଜିକ ଦୂରତ୍ୱ ରକ୍ଷା କରିବା, ବାହାରେ ନ ବୁଲିବା ଓ ସାନିଟାଇଜର ବ୍ୟବହାର ଆଦିକୁ ନେଇ ଚିତ୍ରକଳା ଏବଂ ଟିକ୍ଟକ୍ ପ୍ରସ୍ତୁତ କରି ସୋସିଆଲ ମିଡିଆରେ ଛାଡ଼ି ଏସବୁକୁ ମାନିବା ପାଇଁ ଜନସାଧାରଣଙ୍କୁ ଅନୁରୋଧ କରିଛନ୍ତି। କରୋନା ଯୋଦ୍ଧା ଭାବେ ଡାକ୍ତର, ସ୍ବାସ୍ଥ୍ୟକର୍ମୀ, ପୋଲିସ, ସଫେଇ କର୍ମଚାରୀ, ଗଣମାଧ୍ୟମ ପ୍ରତିନିଧିଙ୍କୁ ସମ୍ମାନ ମଧ୍ୟ ଜଣାଇଛନ୍ତି ଅଙ୍କିତା। ସେହିପରି ରାଜ୍ୟ ବାହାରେ ଫସିରହିଥିବା ଲୋକଙ୍କୁ ଟିକ୍ଟକରେ ଅଭିନୟ ଜରିଆରେ ଧୈର୍ଯ୍ୟର ସହ ଅପେକ୍ଷା କରିବାକୁ ଅନୁରୋଧ କରିଛନ୍ତି। ତେବେ କଥାରେ ଅଛି ଛୁରୀର ଦୁଇଟି ଧାର। ଡାକ୍ତର ହାତରେ ପଡ଼ିିଲେ ଶହ ଶହ ଜୀବନ ବଞ୍ଚାଏ, ମାତ୍ର ଅସାମାଜିକ ବ୍ୟକ୍ତି ହାତରେ ପଡ଼ିଲେ ଅନେକ ଜୀବନ ଚାଲିଯାଏ। ଆଜିର ଯୁବପିଢି ସୋସିଆଲ ମିଡ଼ିଆ, ଟିକ୍ଟକ ଆଦିକୁ କେଉଁ ଢଙ୍ଗରେ ବ୍ୟବହାର କରୁଛନ୍ତି ତାହା କାହାରିକୁ ଅଛପା ନାହିଁ। କିନ୍ତୁ କରୋନା ପାଇଁ ଟିକ୍ଟକକୁ ସମାଜର ହିତ ପାଇଁ ଏଭଳି ଭାବେ ବ୍ୟବହାର କରାଯାଇପାରିବ ବୋଲି ଅଙ୍କିତା କରି ଦେଖାଇଛନ୍ତି।
