କରାଚୀ, ୨୬ା୧ (ପି.ଟିି.)- ଚଳିତ ବର୍ଷ ସେପ୍ଟେମ୍ବରରେ ପାକିସ୍ତାନ ଟି୨୦ ଏସିଆ କପ୍ ଆୟୋଜନ କରୁଛି। ଏଥିରେ ଅଂଶଗ୍ରହଣ ଲାଗି ଭାରତ ଯଦି ରାଜି ନ ହୁଏ ତେବେ ୨୦୨୧ରେ ଏହି ଦେଶରେ ଖେଳାଯିବାକୁ ଥିବା ଟି୨୦ ବିଶ୍ୱକପ୍ ଲାଗି ଆମେ ଦଳ ପଠାଇବୁ ନାହିଁ ବୋଲି ପାକିସ୍ତାନ କ୍ରିକେଟ ବୋର୍ଡ (ପିସିବି) ମୁଖ୍ୟ କାର୍ଯ୍ୟନିର୍ବାହୀ ଓ୍ବାସିମ୍ ଖାଁ ପ୍ରକାଶ କରିଛନ୍ତି। ପିସିବି ଏସିଆ କପ୍ ଆୟୋଜନ ଅଧିକାର ବାଂଲାଦେଶ କ୍ରିକେଟ ବୋର୍ଡ (ବିସିବି)କୁ ପ୍ରଦାନ କରିଛି ବୋଲି ଗଣମାଧ୍ୟମ ରିପୋର୍ଟରେ ଯାହା ପ୍ରକାଶ ପାଇଛି ପାକିସ୍ତାନ କ୍ରିକେଟ ବୋର୍ଡର ଏହି ସିନିୟର ଅଫିସିଆଲ ତାହାର ଖଣ୍ଡନ କରିଛନ୍ତି। ବାଂଲାଦେଶ କ୍ରିକେଟ ଦଳ ଯେପରି ପାକିସ୍ତାନ ଟୁର୍ରେ ଆସିବା ଲାଗି ରାଜି ହେବ ତାହାକୁ ଲକ୍ଷ୍ୟ ରଖି ପିସିବି ନିଜକୁ ମିଳିଥିବା ଟି୨୦ ଏସିଆ କପ୍ ଅଧିକାର ବିସିବିକୁ ପ୍ରଦାନ କରିବା ଲାଗି ରାଜି ହୋଇଥିବା ରିପୋର୍ଟରେ ପ୍ରକାଶ ପାଇଥିଲା। ଓ୍ବାସିମ ଖାଁ କହିଛନ୍ତି ଏସିଆନ କ୍ରିକେଟ କାଉନ୍ସିଲ (ଏସିସି) ଆମକୁ ଆୟୋଜନ ଅଧିକାର ପ୍ରଦାନ କରିଛି। ଏହାକୁ ଆମେ ଅନ୍ୟ କାହାରିକୁ ହସ୍ତାନ୍ତର କରିବା ଅଧିକାର ଆମର ନାହିଁ।
