ବର୍ଲିନ, ୧୬।୧୨ (ଏଏଫ୍ପି)- ଏଟିପି ମାନ୍ୟତାର ଶ୍ରେଷ୍ଠ ୩୦ ମଧ୍ୟରେ ସ୍ଥାନ ପାଇଥିବା ଜଣେ ଖେଳାଳିଙ୍କ ସମେତ ମୋଟ ୧୩୫ ଜଣ ଟେନିସ ଖେଳାଳି ଅନ୍ତର୍ଜାତୀୟ ବେଟିଂ ସ୍କାଣ୍ଡାଲରେ ଜଡ଼ିତ ରହିଛନ୍ତି ବୋଲି ଜର୍ମାନ ମିଡିଆ ପକ୍ଷରୁ ରିପୋର୍ଟ ପ୍ରକାଶ ପାଇଛି। ଦୈନିକ ଖବରକାଗଜ ‘ଡାଇ ଓ୍ବେଲ୍ଟ’ ଓ ବ୍ରଡ୍କାଷ୍ଟର ଜେଡିଏଫ୍ ପକ୍ଷରୁ ପ୍ରକାଶିତ ମିଳିତ ରିପୋର୍ଟ ଅନୁଯାୟୀ ବିଶ୍ୱ ପୁରୁଷ ସିଙ୍ଗଲ୍ସର ଶ୍ରେଷ୍ଠ-୩୦ରେ ରହିଥିବା ଜଣେ ଖେଳାଳି ଏଥିରେ ସଂପୃକ୍ତ ରହିଛନ୍ତି। ଏହି ଖେଳାଳି ଜଣଙ୍କ ମଧ୍ୟ ୩ଟି ଏଟିପି ଟାଇଟଲ୍ ଜିତିଛନ୍ତି। ‘ଆମେ ଆର୍ମେନିଆର ଏକ ବେଟିଂ ମାଫିଆ ନେଟ୍ଓ୍ବର୍କ ବିଷୟରେ କହୁଛୁ, ଯାହାକି ୟୁରୋପର ୭ଟି ଦେଶକୁ ବିସ୍ତାରିତ ହୋଇଛି ଏବଂ ବଡ଼ ଧରଣର ହେରଫେର୍ କରୁଛି’ ବୋଲି ବେଲଜିୟମର ଷ୍ଟେଟ୍ ପ୍ରୋସିକ୍ୟୁଟର ଏରିକ୍ ବିସ୍ଚପ୍ କହିଛନ୍ତି। ଏହି ସ୍କାଣ୍ଡାଲ ମ୍ୟାଚ୍ ଫିକ୍ସ ଭଳି ଶହ ଶହ ଛୋଟ ବେଟ୍ରେ ଜଡ଼ିତ ରହି ପ୍ରତି କେସ୍ରେ ୧୦ ଲକ୍ଷ ୟୁରୋ ଲାଭ କରିଥାନ୍ତି। ଆର୍ଜେଣ୍ଟିନାର ପୂର୍ବତନ ଖେଳାଳି ମାର୍କୋ ତ୍ରୁଙ୍ଗେଲିଟି ଜେଡିଏଫ୍ ଓ ଡାଏ ଓ୍ବେଲ୍ଟକୁ ସାକ୍ଷାତକାର ଅବସରରେ କହିଛନ୍ତି, ତାଙ୍କୁ ମଧ୍ୟ ମ୍ୟାଚ୍ ଫିକ୍ସର ପକ୍ଷରୁ ଯୋଗଯୋଗ କରାଯାଇଥିଲା।
