କୋଏମ୍ବାଟୁର,୧୮।୭: ତାମିଲନାଡୁ କୋଏମ୍ବାଟୁରରେ ବୁଧବାର ଟ୍ରାଫିକ୍ ପୋଲିସଙ୍କୁ ଏକ କ୍ୟାମେରା ବଣ୍ଟନ କରାଯାଇଛି। ଏହି କ୍ୟାମେରାକୁ ସେମାନେ ନିଜ ପୋଷାକରେ ଲଗାଇପାରିବେ। ଏହାଦ୍ୱାରା ଘଟଣାସ୍ଥଳରେ ଟ୍ରାଫିକ୍ ନିୟମକୁ ଉଲ୍ଲଂଘନ କରୁଥିବା ବ୍ୟକ୍ତିଙ୍କ ତୁରନ୍ତ ଭିଡିଓ ରେକର୍ଡ ହେବା ସହ ତାଙ୍କ ଉପରେ ଜରିମାନା ମଧ୍ୟ ଲଗାଯାଇପାରିବ। ସଡ଼କ ଦୁର୍ଘଟଣାକୁ ଏଡ଼ାଇବା ପାଇଁ କାର୍ଯ୍ୟ କରୁଥିବା ଏନଜିଓ ‘ଓ୍ବିର’ ପକ୍ଷରୁ ପୋଲିସଙ୍କୁ ଏହି କ୍ୟାମେରା ବଣ୍ଟନ କରାଯାଇଛି। ପ୍ରଥମ ପର୍ଯ୍ୟାୟରେ ପୋଲିସଙ୍କୁ ୭୦ଟି କ୍ୟାମେରା ପ୍ରଦାନ କରାଯାଇଛି। ଏହି କ୍ୟାମେରା ମଧ୍ୟରୁ ୨୦ଟିରେ ଇଣ୍ଟରନେଟ ଯୋଗାଯୋଗ ପାଇଁ ସିମ୍ କାର୍ଡ ଲାଗିଛି। ଏହା ଜରିଆରେ ପୋଲିସ କର୍ମଚାରୀମାନେ ଘଟଣାସ୍ଥଳରୁ କଣ୍ଟ୍ରୋଲ ରୁମ୍କୁ ଲଗାତାର ଭାବେ ଭିଡିଓ ପଠାଇପାରିବେ। ତେବେ ଏହି କ୍ୟାମେରାର ବିଶେଷତ୍ୱ ହେଲା ଏହା ୮ଘଣ୍ଟା ପର୍ଯ୍ୟନ୍ତ ସିଧା ପ୍ରସାରଣ କରିପାରିବ। ଏହାକୁ ରାସ୍ତାରେ ହେଉଥିବା ପ୍ରଦର୍ଶନ କିମ୍ବା ସାର୍ବଜୈନିକ କାର୍ଯ୍ୟକ୍ରମରେ ବ୍ୟବହାର କରାଯାଇପାରିବ। କେବଳ ସେତିକି ନୁହେଁ, ଏହି କ୍ୟାମେରା ଦ୍ୱାରା ଟ୍ରାଫିକ୍ ପୋଲିସଙ୍କ ପାରଦର୍ଶିତା ବଢ଼ିବା ସହ ଭ୍ରଷ୍ଟାଚାର ଉପରେ ମଧ୍ୟ କଟକଣା ଲଗାଯାଇପାରିବ। ପୋଲିସ କର୍ମଚାରୀ ଯାହା କରିବେ ସିଧାସଳଖ ଏହା କ୍ୟାମେରାରେ କଏଦ୍ ହେବ ବୋଲି ସୂଚନା ମିଳିଛି।
