ଏଥେନ୍ସ,୫।୫(ଏଏଫ୍ପି): ଗ୍ରୀସ୍ରେ ଫୁଟବଲ ଆରମ୍ଭ ହେବାକୁ ଯାଉଛି। ଗ୍ରୀକ୍ କ୍ରୀଡ଼ାମନ୍ତ୍ରୀ ଲେଫ୍ଟେରିସ୍ ଆଭଗେନାକିସ୍ ଏ ନେଇ ସୂଚନା ଦେଇଛନ୍ତି। ଦେଶରେ ଟ୍ରେନିଂ ଆରମ୍ଭ କରିବାକୁ ଫୁଟବଲରମାନେ ପ୍ରସ୍ତୁତି ଆରମ୍ଭ କରିଛନ୍ତି। କୋଭିଡ-୧୯ ମହାମାରୀ କାରଣୁ ଗ୍ରୀସ୍ରେ ଗତ ଦୁଇମାସ ଧରି ଲକ୍ଡାଉନ୍ ଜାରି ହୋଇଥିଲା। ଏହାକୁ ଧିରେଧିରେ ସରକାର ଉଠାଇବାକୁ ନିଷ୍ପତ୍ତି ନେଇଛନ୍ତି। ପର୍ଯ୍ୟାୟକ୍ରମେ ଫୁଟବଲ ସେସନ ଆରମ୍ଭ ହେବ ବୋଲି ସରକାରଙ୍କ ତରଫରୁ କୁହାଯାଇଛି।
ତେବେ ସବୁ ପ୍ରକାର କଟକଣାକୁ ଏବେ ଉଠାଇବା ସମ୍ଭବ ନୁହଁ ଓ ଏ ନେଇ ଏବେ କିଛି କହିହେବନାହିଁ। ସ୍ବାସ୍ଥ୍ୟ ବିଶେଷଜ୍ଞମାନଙ୍କ ପରାମର୍ଶକୁ ଗୁରୁତ୍ୱ ଦିଆଯାଉଛି। ତେବେ ମଣିଷ ଜୀବନକୁ ହିଁ ପ୍ରାଥମିକତା ଦିଆଯାଇଛି। ରୁଦ୍ଧଦ୍ୱାରରେ ସୁପର ଲିଗ୍ ଆରମ୍ଭ ହେବ ବୋଲି କ୍ରୀଡ଼ାମନ୍ତ୍ରୀ କହିଛନ୍ତି। ଦେଶରେ ଆଗଧାଡିର ଶ୍ରେଷ୍ଠ ୧୪ଟି କ୍ଲବ ମଙ୍ଗଳବାରଠାରୁ ଆଉଟ୍ଡୋର ଟ୍ରେନିଂ ଆରମ୍ଭ କରିବେ। ଏଥିରେ ୬ରୁ ୮ ଜଣ ଖେଳାଳି ଅଂଶଗ୍ରହଣ କରିବେ। ଏଥିରେ ସାମାଜିକ ଦୂରତା ସହ ସ୍ବାସ୍ଥ୍ୟଗତ ନିୟମକୁ ଅନୁସରଣ କରାଯିବ ବୋଲି ସେ କହିଛନ୍ତି। ଜୁନ୍ ୧୪ରୁ ଫୁଟବଲ ଅଭିଯାନ ଆରମ୍ଭ ହେବ ବୋଲି ସେ ଆଶା ପ୍ରକାଶ କରିଛନ୍ତି। ଏଥିପାଇଁ ସରକାରଙ୍କ ଅନୁମତି ଅବଶ୍ୟକ। ତେବେ କୌଣସି ଆଥଲେଟଙ୍କ ନିରାପତ୍ତା ତଥା ସ୍ବାସ୍ଥ୍ୟକୁ ବଳି ଦିଆଯାଇ କିଛି କରାଯିବ ନାହିଁ ବୋଲି ସେ ସ୍ପଷ୍ଟ କରିଛନ୍ତି।
