ଖ୍ରୀଷ୍ଟଚର୍ଚ୍ଚ,୧।୩- ଭାରତୀୟ ଅଧିନାୟକ ବିରାଟ କୋହଲି ଏବେ ଖରାପ ଫର୍ମ ଦେଇ ଗତି କରୁଛନ୍ତି। ସେ ଗତ ୨୦ ଇନିଂସରେ ତିନି ସଂଖ୍ୟା ବିଶିଷ୍ଟ ସ୍କୋର ଛୁଇଁ ପାରି ନାହାନ୍ତି, ଯାହାକି ଟିମ ଇଣ୍ଡିଆ ପାଇଁ ଚିନ୍ତାର କାରଣ। ନ୍ୟୁଜିଲାଣ୍ଡ ବିପକ୍ଷ ଦ୍ୱିତୀୟ ଟେଷ୍ଟର ପ୍ରଥମ ଇନିଂସରେ କୋହଲି ମାତ୍ର ୩ ରନ କରି ଆଉଟ୍ ହୋଇଥିଲେ ଓ ଭାରତୀୟ ଦଳର ଏକ ଡିଆରଏସ୍ ମଧ୍ୟ ନଷ୍ଟ କରିଥିଲେ। ଏଥିନେଇ ସୋସିଆଲ ମିଡିଆରେ ତାଙ୍କୁ ପ୍ରବଳ ସମାଲୋଚନାର ସମ୍ମୁଖୀନ ହେବାକୁ ପଡ଼ିଥିଲା। ଖ୍ରୀଷ୍ଟଚର୍ଚ୍ଚ ଟେଷ୍ଟର ଦ୍ୱିତୀୟ ଇନିଂସ ମିଶାଇ କୋହଲି ଟେଷ୍ଟ କ୍ୟାରିୟରରେ ଏପର୍ଯ୍ୟନ୍ତ ୧୫ ଥର ଏଲବିଡବ୍ଲ୍ୟୁ ଆଉଟ୍ ହୋଇଛନ୍ତି। କୌତୂହଳର ବିଷୟ ହେଉଛି, ସେ ୧୪ ଥର ଡିଆରଏସ୍ ନେଇଛନ୍ତି। ମାତ୍ର ନିଜ ପାଇଁ ଡିଆରଏସ୍ ବ୍ୟବହାର କରିବାରେ କୋହଲିଙ୍କ ରେକର୍ଡ ସେତେଟା ଭଲ ନାହିଁ। ସେ ନେଇଥିବା ୧୪ ଡିଆରଏସ୍ରୁ ୯ଟି ଭାରତ ହରାଇଛି। ଏହାର ଅର୍ଥ କୋହଲି ନିଜ ପାଇଁ ବ୍ୟବହାର କରୁଥିବା ରିଭ୍ୟୁର ୬୦ ପ୍ରତିଶତ ଭୁଲ। ୩ ଥର ଅମ୍ପାୟରଙ୍କ ନିଷ୍ପତ୍ତି ଯୋଗୁ ତାଙ୍କୁ ଆଉଟ୍ ହେବାକୁ ପଡ଼ିଛି। କେବଳ ଦୁଇ ଥର କୋହଲି ସଫଳ ହୋଇଛନ୍ତି।
