ଭୁବନେଶ୍ୱର, ୪।୬(କ୍ରୀଡ଼ା ପ୍ରତିନିଧି)- ଇଣ୍ଡିଆନ ସୁପରଲିଗ୍(ଆଇଏସ୍ଏଲ)ର ୭ମ ସିଜନ ପୂର୍ବରୁ ଓଡ଼ିଶା ଏଫସି ଲେଫ୍ଟ ବ୍ୟାକ୍ ଜର୍ଜ ଡିସୁଜାଙ୍କ ସହ ଚୁକ୍ତି କରିଛି। ଗୋଆର ଡିସୁଜା ସେସା ଫୁଟବଲ ଏକାଡେମୀରୁ କ୍ୟାରିୟର ଆରମ୍ଭ କରିଥିଲେ। ଏହାପରେ ସେ ସ୍ପୋର୍ଟିଂ କ୍ଲବ ଡି’ଗୋଆ ପକ୍ଷରୁ ଖେଳିଥିଲେ। ଗୋଆ ପ୍ରୋ ଲିଗ୍(ଜିପିଏଲ)ରେ ପ୍ରଭାବୀ ପ୍ରଦର୍ଶନ କରିବା ପରେ ଏହି ଡିଫେଣ୍ଡର ଭୁବନେଶ୍ୱର ଭିତ୍ତିକ ଓଡ଼ିଶା ଏଫସି ସହ ୨ ବର୍ଷିଆ ଚୁକ୍ତିର ସୁଯୋଗ ପାଇଛନ୍ତି। ”ଡିସୁଜାଙ୍କୁ ଆମେ କ୍ଲବକୁ ସ୍ବାଗତ କରୁଛୁ। ଜିପିଏଲରେ ଭଲ ପ୍ରଦର୍ଶନ କରି ସେ ଆମ ନଜରକୁ ଆସିଥିଲେ। ଲେଫ୍ଟବ୍ୟାକ୍ଭାବେ ତାଙ୍କ ପ୍ରଦର୍ଶନ ବହୁତ ଭଲ ରହିଥିଲା। ତାଙ୍କ ଉପସ୍ଥିତିରେ ଆମ ଦଳକୁ ଫାଇଦା ମିଳିବା ଆଶା ରହିଛି“ ବୋଲି କ୍ଲବ ସଭାପତି ରୋହନ ଶର୍ମା ପ୍ରକାଶ କରିଛନ୍ତି। ଅନ୍ୟପକ୍ଷରେ ଓଡ଼ିଶା ଏଫସିରେ ଯୋଗଦେବାରେ ଖୁସି ଜାହିର କରିଛନ୍ତି ଡିସୁଜା। ”ଏହି କ୍ଲବ ସହିତ ଚୁକ୍ତିକରି ମୁଁ ଅତ୍ୟନ୍ତ ଆନନ୍ଦିତ। ଏବେ ଇଣ୍ଡିଆନ ସୁପରଲିଗ୍ ଖେଳିବାକୁ ମୁଁ ବ୍ୟଗ୍ରତାର ସହ ଅପେକ୍ଷା କରିବି। ଏହା ମୋ ପାଇଁ ଏକ ଭଲ ପ୍ରମୋଶନ ଏବଂ ଓଏଫସି ପକ୍ଷରୁ ଖେଳିବାଦ୍ୱାରା ଅଭିଜ୍ଞତା ମଧ୍ୟ ହାସଲ ହେବ। ଦଳ ମୋ ଉପରେ ଆସ୍ଥା ରଖିଥିବାରୁ ମୁଁ ମଧ୍ୟ ଓଏଫସି ପାଇଁ ଶ୍ରେଷ୍ଠ ପ୍ରଦର୍ଶନ ଦେବାନେଇ ଆଶାବାଦୀ“ ବୋଲି ସେ ପ୍ରକାଶ କରିଛନ୍ତି।
